HERGE Les Aventures de TINTIN en PATOIS du Cambrésis EUCH TINTIN ET CHE PICAROS Par HECTOR MELON D'AUBIER

EUCH TINTIN ET CHE PICAROS

Et v'là Tintin qu'y arviant d'inn'’prom'nate in moto. Y rinte à ch'catio d'Moulinsart.

Euch Cap'tan-ne Haddock l'vot arriveu, y l'attint à l'farniette :

<<Ah ! Vos v'là rintreu !

V'né qu'euj'vos lisse chou qu'euj'découfe à l'instint minme dins Paris-Match ...

« Eul célépe Cintatrice Bianca Castafiore porsuit acteu-ell'mint eus tourneu triomphale in Amérique du Sud. A ch'eul suite d'euch l'Equateur, ch'eul Colombie et l'Vénézuéla, all' s'rindra au San Théodoros dù qu'all s'ra archu pa l'Général Tapioca. »

Ch't'Général Tapioca, ché bin ch'tilal qu'y a rinverseu no vièle connéssince Alcazar ? >>

<<Ouais ! Aveuc l'aite d'la Bordurie de Pleksygladz. In dit qu'ché in véritape tyrin, ch'Tapioca, creuel et vaniteux. Vaniteux au po-ant d'avoèr débaptiseu l'capitale, Las Dopicos, pou li donneu sin nom à li : Tapiocapolis. Quint à ch'pofe Alcazar, y l'a pris l'maquis aveuc inn'pognée d'partisins. >>

<<Ah, ouais ! Ché fameux Picaros ! >>

<<Ouais,ché Picaros ! Ché l'nom d'’ché guérilleros qu'y z'ont jureu d'rinverseu Tapioca et sin régin-me.

Y sont sout'nan, qu'in dit, pa inn'grin-ne puissince commerchiale et finincieure ch'eul là : l'Inteurnatianale Banana Company ... In bio imbroglio, come vos vé-yé ! >>

<< Mé ché inn'véritape tiote conférinche qu'vos v'né d'feure là, Tintin. J'eun'né sof pou vos ! In whisky ? >>

<<Nan, nan merchi ! Jinmeu d'alcool, vos savé bin. >>

<<Alors à vos sinté ! ... In l'vint sin vière et l'’portint insuite à s'bouque.

« PFOUAH ! »

Mille mi-ions d'mille sabords ! Qu'y ché l'sombre oryctérope qu'y a rimplaceu min whisky pa ch't'extreu d'io d'javeul ? >>

<<D'io d'javeul !!! >>

<<Ou bé inn'chorte eud'vitriol d'euch minme tonio ... Chi j'os'ros dire ! ... T'nant goté meu cha ? …... >>

<<Heu …... Arniflint ch'vière, gotint du biout dé lèfe . Tintin :

J'eun'sus pon expeurt come vos, naturell'mint, mé y m'sin-ne qu'ché bin l'gôt du whisky ! >>

<<Du whisky !!!!!! …...

Min jonne ami, chi cha ché du whisky, j'veux bin ête kingé in coquile St Jacques ! Et vos v'né d'eul dire, j'mi connos inn'mioche !!! >>

<<Bin sûr ! Bin sûr ! Mé pourtint ! >>

1

<<J'eun'sé pon chou qu'ché qu'eus’truc là, mé ch'né chertén'mint pon du whisky ! ...

Infin ! Pou vos feure plésir, j'veux bin core éssé-yeu…....

Pfouah ! Infect ! Epouvintape ! Innomape ! Abominape ! >>

Tintin pou kingé l'atmosphère alleume eul télévisian.

Ché quéqu'an qui kinte :

« …... iss ... d'me vir …... si beulle ... »

<<NAN !>> Crie l'Cap'tan-ne

« In s'miroir ...Chacan ara arconnu l'vox d'Or d'eul célépe Bianca Castafiore ...

<<Pou cha ouais, qu'in l'a arconnu ! >> Cantinue l'Cap'tan-ne

« Qu'y porsuit eus tournant triomphale in Amérique latin-ne. L'v'là chi à s'n'arriveu à Tapiocapolis au San Théodoros. Dù qu'all a archu in accueil inthousiasme. All étot come d'habitrude accompagneu d'eus fidinle camériste Irma et d'Igor Wagner sin pianiste.

Eud puss, pou veilleu su sé pimderliots, qu'y sont assureu pou pusieur mi-ions d'dollar, all'é toudis sous l'garte de deux détectifes qu'y l'a suiv'te discrèt'mint dins tot sé déplac'mint. >>

Pou ceuss qu'y arwette ch'eul télé, y s'aront vu come mi qu'no deux détectifes y z'ont rateu ch'eul premian marche d'eul passereule et sont quéhu in bas d'leu guinme pou finir l'cul pa-tière.

Sodin, l'téléphane sanne : « Drring, Drring »

<<Allo ? ... Ouais... Qu'y cha ? ... >>

A l'aute bout du fil  :

<<Lampion, ouais ! …... Salut ! Dis donque, j'vians vir la Castagnette à l'télé. Et ché come cha qu'j'apprinds qu'eus quincaillerie è mint'nint assureu et cha pou inn'fortin-ne ! ...

Alors, j'treufe qu't'aros pu t'arringeu pou qu'che sot mi qu'y é l'affeure. Ch'né vrémint pon l'pon-ne d'avoèr d'z'amis chi qu'y vos lèche tombeu à l'premian occassian ....

Tatata …... Quind in veut rinte serviche à quéqu'an, in treufe toudis l'mo-yan ! ... Ouais, parfèt'mint ! ...

V'là chou qu'euj'dis mi. ... Eud puss ... >> Y a pon l'timps d'finir :

<<Quo ? Mé je …... Com ... Ah ! Cha ... Mé j'vos dis que ... Mé ... Pard ... Oh ! Pa ximpe ... Et pis fleute, à la fin ! ... Nan mé sins blaque ! ...

In raccrochint l'téléphane :

Cha ché in combe! Ché mi qu'y m'feut ingueulé pa ch't'animal d'Lampion pas'que ch'né pon li qu'y a assureu ché pimderliots d'eul Castafiore! >>

Tout in fésint, y seusit sin vière et l'bot d'in trait.

«  PFOUAH ! ... »

Mille mi-iard d'’mille sabords ! Pfff ! Que poson !

« POSON !!! » >>

2

<<Vé-yons Cap'tan-ne, qu'y cach'rot à vos imposanné ? Vos avé bin queuqu' z'ennemi, sins doute, mé pon acharneu à ch'po-ant là ! >>

<<Possipe ! Mé mi j'eum sins tot drôle, d'in cop ! >>

<<Mé quo qu'y l'a ch'whisky ? J'eun l'treufe pon movié, mi, bin au contraire ! >> Annance Milou qu'y arléquot chou qu'y étot quéhu pa-tière.

<<Alleu vos étinte, Cap'tan-ne. Cha va passeu ...

Banne nuit ! Cha ira miu d'mon.

J'me d'min-ne tot d'minme si ... Milou !!!

Incorrigipe Milou ! T'as bu ch'whisky répindu pa-tière. >>

In berloquint à drote pis à goche :

<<Bin quo ? Quo qu'vos l'y arprocheu à ch'whisky ? Hic ! >>

<<D'tot manieure, ché bin la preufe qu'y né pon imposonné. Allé au dodo, ivrogne !Va cuveu té bossons ! >> L'rouspeute Tintin.

<<Hic ! >> Répand Milou.

Eul lind'mon matan, s'ravisint dins l'glache d'eul challe de bain, l'Capt'an-ne :

<<Drôle de min-ne, eus matan ? Ché sur'mint ch'fichu whisky qu'jé ingurgiteu hieur ...

Oh et pis zut, tint pis ! Et d'élleurs, ché l'hoère dé z'informatians. >> Alleumint sin transistor.

« Aucan communiqueu n'a été publieu à l'ichue d'eul réunian ... ... Tapiocapolis : Ch'eul célépe Cintatrice Bianca Castafiore qu'y donnot hieur soèr inn'tourneu d'gala dù qu'y l'assistot l'général Tapioca, a été arréteu à l'ichue d'eul réprésintatian ? Ché z'autoriteu Santhéodorianne s'arfuste à tot comminteur. >>

<<Tintin ! Tintin ! Y viant d'in d'arriveu inn' bin banne au Général Tapioca ...

Y a fé arréteu la Castafiore, l'pofe home. Quo qu'y sé foureu là su lé bros !?! >>

<<La Castafiore ? ... Arréteu ? ... Nan ? >>

<<D'inn'chertanne manieure, ouais ... >>

L'Professeu Tourn'sol fé s'n'intreu.

<<Tintan-ne ! Captin ! Ché affreu ! Ché terripe ! ... Liseu ! Dins l'Dépêche d'eus matan ! Bianca Castafiore a été qu' ... >>

<<Y a dé détals ? >> D'minne eul Cap'tan-ne.

<<In prison ! Ch'teu pofe tiote. Mi cha m'cope lé bros et lé guinme ! >> Se fésint l' Professeu y s'assot su l'foteul dù qu'y dort Milou :

<<GROUAHH ! >>

3

Pofe Tourn'sol, y s'arlève pus vite qu'y n's'étot assis.

<<Acouté meu cha Tintin, ché du pus haut cominque :

<< Allé z'y Cap'tan-ne, j'vos acoute ! >>

« Accuseu d'complot conte eul vie du Général Tapioca , ch'eul Cintatrice é arréteu ... Inn' perquisitian a peurmis d'déceuvrir dins sé bagaches dé documints qu'y établirote eud'façan irréfutape l'éxistince d'in complot visint à supprimeu l'Général Tapioca et à rinverseu l'réginme. L'gouvernemint Santhéodorian lèche intinte qu'eul cinte d'euch complot s'rot dins in pays d'Europe occidintale dù la Diva arot séjourneu avint sin départ pou l'Amérique du Sud. »

<<Mé ché du romin feul'tan, cha ! >> Dit Tintin

<<La Castafiore canspiratrice !!! Chi , au moinse ch'étot ch'eul canspiratian du chilince ! >> Se veut drôle l'Cap'tan-ne.

In cop d'sannette : DONG , Nestor viant annancé dé visiteu :

<<Padon, M'sieu ! Y a in bas deux jornalisses qu'y d'minne si M'sieu peut bin lé z'arcevir. >>

<<D'jà ? ...

Bon ! L'timps d'passeu inn' rope eud'quinme et j'sus à euss ... ... ...

Ah ! M'sieu Jean Loup de la Batellerie et Walter Rizotto de Paris-Match ! In quo, j'peux vos êtes utinle ? >>

<<B'jour, Cap'tan-ne ! Veu-yé nos excuseu d'arriveu si tôt, mé in volot ête ché premian à vos d'mindé chou qu'vos pinsé d'l'affeure Castafiore. >>

<<Chou qu'j'in pinse ? ... Ché bin simpe !

J'treufe cha d'eul pure bouffan'rie ! Acceusé la Castafiore d'complot, ché parfèt'mint ridicule ! >>

<<Ouais ! Mé ché accusatians qu'in porte conte vos, qu'in dites vos ? >>

<<Dé accusatians conte mi ? !!!! >>

<<Ah ! Vos n'ête pon incor au courint ? V'là chi La Vérité d'eus matin. Lisé ! >>

<< ? ... Pon possipe ! Y sont complèt'mint timbré ou quo ? Ché tapioquiste là ? ...

Ah, ché vos Tintin ! T'né liseu cha ! Cha vos concherne égal'mint. >>

<<Mi ? >>

<<Ouais ! Vos ! Lisé cha ! >>

4

« L'affeure Castafiore : Novelle accusatian du gourvernemint du général Tapioca. Euch complot y étot dirigeu d'Moulinsart pa dé partisins du général Alcazar. Parmi ché principaux conjureu : L'Cap'tan-ne Haddock , Tintin l'arporteur, l'Professeu Tourn'sol. Tous lé tros sont dé z'amis d'langue date du Général Alcazar. Ch'eul Castafiore à séjourneu récim'mint à ch'catio d'Moulinsart. »

<<Quo qu'ché d'cha ? Inn'histoère eud'fous ? >> réseume Tintin

<<Donque vos déminté ? >>

<<In v'là inn'questian ! ... Bin sûr qu'in démint ! Tot cha, ché dé histoères à l'graisse eud trombanne à coulisse ! >> Déclame l'Cap'tan-ne.

Nouvio cop d'sannette « DONG », Nestor fé intreu ché gins. D'aute journalisse.

<<La Dépêche ! B'jour !>>

<< ? ? ? >>

<<Queuqu'mots pou Radio Cinte, Cap'tan-ne >>

<<Et pou Radio Ecleur ... >>

<<M'sieu ! Euj'considère qu'ché accusatian sont ossi grotesque que minsangère . Nos, dé conjureu ? ... ... Mé ché d'eul folie pure ! ... ... So-yé sérieux. V'là chi, justemint l'Professeu Tourn'sol. Ravisé le et dites meu si vos l'cro-yé capape eud prin-ne part à in complot ? >> Leu d'min-ne l'Cap'tan-ne.

<< ? ... L'professeu, pris au dépourvu :

Mé parfét'mint, M'sieu ! Et j'm'in vinte !

Parfèt'mint ! Et j'pase mé mots. Euj'dis qu'ché inn'honte ! In scindale ! Imprisonné insin inn'fèble finme ! Y fot immédiat'mint alerteu ch'eul ligue dé drot d'l'home. >>

Lé journalisse :

<<Vos déminté Cap'tan-ne. Mé tot d'minme, l'général Alcazar, ché bin in d'vo z'ami. S'pon ? >>

<<In d'mé z'ami ? J'lé rincontreu deux ou tros fos, ché tot ! >>

<<Sot ! Mé vos n'ni'ré pon qu'la Signora Castafiore a été vo z'inviteu ichi, à ch'catio. Et que ... ... >>

<<Inviteu ! Façan d'parleu ... D'élleurs d'là à conspireu ... Et pis, n'parlons pus d'cha. Ché accusatians sont démintieules, j'vos l'répète ! ... V'là chi in whisky, M'sieu ...

Beuvons à l'libératian d'la signora Castafiore ! >>

<<A vos sinteu ... >> Qu'y diste tartous

<<Beeeurk ! Arfé ch'Cap'tan-ne apreu avir gouteu à sin vière.

Stop ! Eun' beuvé pon cha ! Y drot y avir erreur. Euch whisky y l'é imbuvape. >>

5

<<Imbuvape? Mé au cantreure, y l'é excellint ... Délicieux minme ! ... Mmmmm .>>

<<N'beuvé pon, j'vos dis ! Ch'whisky ché in véritape poson ! >>

<<Bin sûr ! Bin sûr ! In poson qu'y tue lint'mint. Ché bin connu ! Ah ! Ah ! Ah ! ...

Et cha tambe bin, just'mint in n'é pon presseu. Ah ! Ah ! Ah ! Ah ! >>

Ch'Cap'tan-ne n'sé pu à que Saint s'voué, y l'in é pinsif :

<<Comint s'fé t'y que j'sus l'seu à trouveu min whisky abominape. Y a in mysteure là d'sous ...

A moinse que ... Ché p't-ête inn' novelle marque aquateu pa Nestor ... J'vas l'y poseu la questian ... >>

Li, Nestor y goutot just'mint ch'whisky :

<<J'eun'comprinds pon l'patron. Y l'é délicieux che Loch-Lomod, come d'habitrude. >>

Y a pon l'timps d'finir sin vière, qu'eul Cap'tan-ne y pousse ch'eul porte et qu'eul vière y s'rinveurse su li .

<< Dites meu, Nestor ... Et bin Nestor ? >>

<<Je ... Hem ... Précisémint, j'm'assuros qu'ch'étot bin du Loch-Lomod come d'habitrude. >>

<<Et vos conclusian, m'n'ami ? >>

<<Ché du Loch-Lomod, M'sieu sins aucan doute ! >>

<<J'n'y comprind rin. Mé alors rin du tout ! >>

Eul soèr v'nu, d'vint s'télé, Tintin propose :

<<Vos n'frotte pon in dernian ésseu ? Pou vir ? >>

<<Oh nan ! Cha suffit come cha! Qu'in n'meu parle pu d'whisky !!! >>

Eul télé, fé passeu inn' pub :

« Si vos êtes déprimeu, si l'timps vos sin-ne long, in seu remète : Loch-Lomod. »

<<Mé ché pon possipe, y l'font expreu ! Ché in complot conte mi ! >>

<< Chut !! A propos d'complot, acouté ! >>

«  ... et in tiète d'euch journal, arv'nons à chou qu'in appeul' d'jà l'affeure Castafiore, et à ché réactian qu'all chuscite dins l'monte, princhipal'mint au San Théodoros.

Ché là, évidan-mint qu'eul ton y é l'pus violint. D'chou qu'in peu in jugeu pa queuqu'extreux d'euch discours prononceu pa l'Général Tapioca à Tapiocapolis, et dins l'queul y s'in é pris à ch'euss qu'y l'appeule ché conjurés d'opéra comique. »

6

«  Et qu'y trim-ne, ch'euss qu'y lach'mint terreu dins leu catio poussiéreux tirent ché fichelles d'eus l'odieux complot. Qu'y trim-ne ch't'infin-me Cap'tan-ne Haddock ! Qu'y trim-ne euch fi-inleu Tintin et ch'fourbe Tourn'sol »

<<Fourbe ti-minme, eh patate !... Fi-inleu pon tint qu'ti, spèce eud marchind d'guano ... Hurle euch Cap'tan-ne Haddock à ch'général via ch'poste eud télé.

J'm'in va li dire eum'façan d'pinseu mi, à ch'Mussolini d'carnaval. >>

<<Mé ... >> S'inteurpose Tintin. Y a pon l'timps d'inteurvenir qu'eul Cap'tan-ne à d'jà pris ch'téléphane :

<<Allo ! Serviche Inteurnatianale ? Vé-yé m'donnant l'Amérique du sud ... Tapiocapolis ! Eul général Tapioca ! ... Comint ? ... Tapioca, ouais, come tapioca, parfèt'mint ! ... >>

<<Ché qu'M'sieu, in n'vind pon d'tapioca ichi. Ché inn'boucherie ichi, M'sieu. L'bouch'rie Sanzot ... D'rin M'sieu ! >>

<<Mille mi-ions d'mille sabords ! Ché toudis su ch'numéro là qu'euj'quet toudis ... >>

<<Pouquo, n'pon invo-yé putot in télégrim-me, Cap'tan-ne ? >>

<<In télégrim-me ! Vos avé résan ? Ché inn'banne ideu cha in télégrim-me.>>

<<Attindé, j'vos danne eul numéro ... >>

In tiot momint pus tard , à ch'burio d'poste, eul préposeu :

<< J'arlis : Général Tapioca, Tapiocapolis,San Théodoros.

Le texte : Profondémint indigneu pa vo accusatian minsongères porteu conte nos-z'aute. Stop. Opposons déminti formeul et chinglint . Stop. Pon d'formule d'politesse. Signature Haddock, Tintin et Tourn'sol. >>

<<Très bin ! J'vos armarcie. >>

<<In télégrim-me d'luxe ? >>

<<Vos n'y êtes pu ? Cha ira come cha ! >>

Eul lind'mon matan , eul jornal La Dépêche titre :

« Haddock : J'nie énergiqu'mint tot implicatian à in complot quéconque.

Tapioca : Nos avons dé preufes irréfutapes d'eul collusian dé conjureux d'Moulinsart aveuc l'Inteurnatianale Banana Compagny. »

Chou qu'y mé incor puss l'Cap'tan-ne hors d'li. Du cop, y l'arprind ch'téléphane et y rinvot in aute télégrim-me :

7

<<Général Tapioca, Tapiocapolis. Ah, vos connéssé ! Bon v'là chi ch'texte : Euh ... ... Vos f'ré in jour rintreu minsonges ... Ouais, au pluriel ! Dins gorge, fiéffeux minteu. Stop. Finiréz (aveuc in Z, s'pon? come Zigomar !) finiréz vos jours su échafaud. Stop. >>

Eul surlind'mon, eul Dépêche titre :

«  L'Général Tapioca offe au Comodore Haddock l'occasian d's'expliqueu lo-yal'mint à Tapiocapolis. »

Pis in intind à l'radio :

« Au cours d'inn'conférinche d'presse, le Général Tapioca a déclareu qu'y allot inviteu l'Comodore Haddock et sé z'amis à v'nir s'expliqueu lo-yal'mint aveuc li à Tapiocapolis. In cas d'accord chacan d'euss, pa l'inteurmédieure d'l'Imbassate, archevra in sauf-conduit. Inn'seu saquo compte, a assureu l'Général, l'arquerche d'eul vérité.»

<<Au fand, ch'n'é pon in movié bougre, euch général. Et jé bin invie d'accepteu s'n'offe. Come cha, au moinse, no banne fos éclint'ra au grind jour. >> déclare sintincieux l'Cap'tan-ne.

<<Ouais, o bé, in s'artrouv'ra tartous in prisan. Come Bianca Castafiore. Merchi bin ! >> L'y répand Tintin.

<<Oh ! Vos êtes toudis méfi-int ! Puisqu'euj'vos dis qu'in ara in sauf-conduit .... >>

<< Tot cha n'me dit rin qu'y valle, Cap'tan-ne. Ce sauf-conduit porrot bin n'ête qu'in attrape nigaud ... >>

<<OOOOH ! ... S'exclin-me Tourn'sol qu'y lisot l'jornal à sin tour : Vos avé vu ? In nos invite là-bas ! Y fot y alleu Cap'tan-ne. >>

<<Ah, ouais ! Pou s'artrouveu in prison, come vo Bianca. Tot cha, ché cosu d'fil blin, min pofe ami, et, leu sauf-conduit ché in attrape nigaud ! >> L'y dit l'Cap'tan-ne qu'y a l'eur d'avir kingeu d'avis.

<<Bravo ! V'là qu'y é parleu ! J'fé mé bagaches et nos partons ! ... >> Confirme l'Professeu.

Eul lind'mon, la Dépêche titre :

« Haddock et sé z'amis répandront-y à l'invitatian du Général Tapioca ! »

Eul jor suivint, la Dépêche titre core :

«  NON ! Dit l'Cap'tan-ne Haddock. J'iré pon à Tapiocapolis. »

8

Incore in jor pus tard, la dépêche titre core :

«  Haddock s'dérope : l'vériteu l'y fé peur. Déclare l'Général Tapioca. »

<< Ah ! J'eum dérope ! ... Ah ! Eul vériteu m'fé peur ! ... Et bé, y va vir d'queu bos j'eum coffe, ch't'espèce d'apprinti dictateu à l'nox d'coco ! >> Ronchanne l'Cap'tan-ne.

<< Du cinlme ! Cap'tan-ne ! >>

<<Du cinlme ! ... Du cinlme ! ... J'voudros bin vos vir vos ! Du cinlme, nan mé  ...

Ah ! Y m'mé au défi, ch't'ostrogoth ! Et bé, in va vir chou qu'in va vir ! ...

Allo ? Télégrim-me ... Ouais ... Ouais, parfét'mint, pou l'général Tapioca. Je dicte ...

Invo-yé sauf-conduits (au pluriel, sauf-conduits) Stop. Arrivons pa retour du courrieu. Stop. Signeu : Haddock ... Bon ... Nan, télégrim-me ordineure !!! ...

V'là, l'sort y in é j'té ! Y va treuvé à qu'y parleu ch't'grotesque polichineule. ... In route Tintin, nos partons ! >>

<<Vos parté, p't-ête, Cap'tan-ne ! Tint qu'à mi, j'eun pars pon !!! >>

<< ??? !!!! >> Fé l'tiète du Cap'tan-ne.

A SUIVRE

9