|
|
|
HERGE
Les
Aventures de TINTIN en
PATOIS du Cambrésis EUCH
TINTIN A CH'PAYS D'EUCH L' OR NOER
Par HECTOR MELON D'AUBIER |
|
EUCH TINTIN A CH'PAYS D'EUCH L'OR NOER Inn'statian chervice : A bord d'leu autio ché Dupont-d klaxanne apreu ch'pompiste. « Pouet-Pouet-Pouet ! Pouet-Pouet ! » <<Cha va ! …... Cha va ! ... J'arrife ! >> <<Tros lite …... >> << Tot cha ! >> <<Ouais ! Et vos lèch ré queulque goutte pou rimplir min briqueu ! >> <<V'là, Monseigneur. >> Dit ch' pompiste d' in eur mécontint. Et lé v'là arperti. Su l' route leu votiure fésot inn' finqué du tonneure. In tiot peu pus long et pou couvrir euch bruit d' eul gimbarde : << Fé donque marcheu l' radio ! Cha s'ra pus gai. >> <<V'là !>> Eul radio all' émétot in eur intrénint : « Boum ! ...Quind min motieur fé boum ... Ch'eul dépanneuse SIMOUN verra veurs vos ... In viteusse ... » Et lé Dupont-d arprin'te in koèr : <<Boum ! ... Quind vos motieur fé boum ... >> << Boum ! ... >> Euch motieur sodin fé « BOUM ! » à sin tour. Ché Dupont-d s' ravisse étonneu, pis : <<Euj' comprinds mint' nint pouquo in appeulle cha in motieur à explosian. >> Avinche Dupont <<Ché pon l' momint d' feure d'l'esprit ... L' y rinvot Dupond. Y s' agit d' trouveu inn' dépin-neuse. >> <<D' accord ! Mé dù ? >> <<Ouais, dù ? >> Arl'vint s tiète, Dupond : <<Sauveu ! Wett, inn' cabin-ne téléphanique.>> Dupond s' in va donc téléphaneu à l' cabin-ne installeu pa ch' eul mason SIMOUN. <<Allo ! SIMOUN à l'accoute ! ... Ouais ! ... Ouais ! ... Route N° chonque ... Kilomète dix huit ... M'sieu Dupond. >> <<Et bin ? >> <<Ch'
eul dépin-neuse s'ra chi dins tros quoart
d' hoère. >> <<In
attindint, in va feumé inn' cigareutte ... >> <<Merchi
Dupond ! >> « Clic » « BOUM » Et v'à ché Dupont-d eul tronche noèrchi,
l' capio involeu et l' eur toudis étonneu
d' chou qu' y viant d' leu arriveu. 1 Eul lind'mon ! Tintin lit sin jornal : << « Eul situatian é grafe ... Aurons nos ch' eul guerre ... samme nos preu ? Rappeul eud ché clache ... L' Armée velle. » Et bin ! Ché pon gai tot cha ... >> Eul téléphane sanne « Dring Dring ». <<Allo ? ... Ouais ... Ah, b'soèr Cap'tan-ne ! ... Cha va ? ... Quo d' neuf ? ... >> <<J' vians d' archevir in papieu du Ministeure d' eul Marine . « Orte à ch' Cap'tan-ne Haddock d' prin-ne immédiat'mint ch' commind'mint d'euch cargo untel (Euch nom drot resteu secret) dù y l' archevra eud novelle instructian » V'à in deux mot, j' sus mobiliseu ... Nan j' n' aré pon l' timps d' alleu vos vir ... J' pers tot d'suite ... Ouais ! ... Ché cha ... Arvoèr ! >> <<Arvoèr Cap'tan-ne ... Et banne chince ... Espérons qu'tot cha n' s'ra qu' inn' foche aleurte ... >> In dring à l' porte, Tintin va euvrir et qu' y qu' y vot ? <<B'jour !>> <<B'jour ! Ché Dupont-d. Qué banne novelle d'vos vir chi ? >> <<Banne novelle ? Y viant chi d' nos arriveu inn' bizoère avinture ! >> <<J' diros minme pus ... Ché inn' avinture bin ... Bizoère ! >> <<Ah ! Raconté meu cha ! ... Mé d'abord, assé-yé vos !>> <<Et, bin v'là ! ... In v'not d'printe eud l'essince et in roulot trinquill'mint. Quind tot à cop, sins crieu garte, no motieur y a fé ... >> In intind au mimme momint in grind « BOUM ! ». <<Ah, cha ché inn' épidémie ... >> annance Tintin. <<In effeu ! V'là xactemint chou qu' y nos é arriveu !>>confirme Dupont <<Ouais ! Mé ché pon tout ! ... Rajoute Dupond Queuqu' z'instint pus tard, min briqueu, qu' j' avos fé rimplir à ch' eul minme pompe, fé xplosian intre mé mon . >> <<Cha s'rot donc l' éssince qu' y ... ? >> <<Qu' y é falsifieu, ouais ! Min brafe Tintin. Ché chou qu' in a pinseu , tot d'suite ... Et chi all é falsifieu, all' lé pa queuqu' an qu' y a intéreu à chou qu' lé motieur fach'te explosian ! Car, n'oblions pon l' viel adache policieu : « Cache à qu' y qu' ché qu' eul crim-me profite » ... Hin ? A qu' y ? J' vas vos l' dire, mi ! ... Al Socianté eud dépin-nache SIMOUN ! ... >> <<Quo qu' vos m' dites là ? >> pose Tintin <<Ouais ! A m'mote qu' l' essince é falsifieu pa la « SIMOUN » all' minme, à fin qu'euch l' autiomobiliste, sin motieur ayint fé xplosian, sot obligeu d' feure appeul à inn dépin-neuse. 2 <<Tot cha é fort possipe, mé ... >> <<Ché chertin ! In va s' mette in kimpagne et d' ichi huit jours, in aura réin-ni asseu d'preufes pou feure arréteu ché dirigint d' eul SIMOUN ! >> <<Euj vos souhaite eud réussir ! ... A pus tard .>> Ché Dupont-d quitte Tintin et comminche d'jà leu inquète : << Pou comminché, in va allé feure in tour du coteu d' eul SIMOUN. Y a just'mint in garache pa lon d' ichi ... >> Arriveu à ch' garage, y vote in ouvrieu mette inn' pincarte conte euch mur : <<In va vir chou qu' y a d' marqueu ? >> <<Si fé ! Si fé ! >> Y ravis'te l' affiche : « In d'min-ne bon chauffeur, bin au courint mécanique pou conduire dépin-neuse SIMOUN. » <<Dis donque, Dupont ! Qu' in pinse tu ? V'là in excéllint mo-yan d' pénétreu dins l'plache et d' observeu chou qu' y s' y pache ... >> <<Banne ideu Dupond !>> Eul lind'mon ! Amo SIMOUN, deux nouvio chauffeurs sont in plache pou ouvreu. << Alors vos avé bon compris chou qu' vos avé à feure ? >> Questianne l' chef d'atelier. << Tot a fé, chef ! >> Tintin, quint à li, y é très inquieu pa c' t' affeure et y décite d' rinte visite à la SPEEDOL, in fournisseu d' carburin. << All' m' intéresse ch' t' histoère d' essince falsifieu ... Jé bin invie d' éssé-yeu d' tiré cha au clair ! ... >> <<Teu n' vas pon t' linceu dins d' novelle avinture ? J' aspire à l' arpos, mi-z'aute. >> Sort Milou, qu' y l' accompin-gne, d' in eur d' arproches. Tintin arrife à l' interprise SPEEDOL et d' min-ne à vir eul Directeur. Pindint ch' timps là, ch' eul SIMOUN archot in appeul : << Allo ! ... SIMOUN ! J' acoute ... Ouais ! ... Route N°6 ... Bin ... Ché pou M'sieu .. ??? >> Dins l' cabin-ne téléphan-nique : 3 <<Dupont ... Ché ch' eul dépin-neusse .. Qu' y ... Euh ... Qu' y é in raque ! >> Léchons ché Dupont-d et arrv'nons à Tintin : <<M'sieu l' Directeur, j' ém'ros avoèr vo avis su l' situatian créeu pa ch' eul mauvièsse qualiteu d' l' essince. >> <<Ah ! M' n' ami, l' situatian all' é catastrophique ... Vé-yé putôt ! Montrint ch' tablio d' courbes statistiques : In deux mots, eul consommatian a diminué eud chossinte chonque pou chint. Et all diminue core tot lé jours ! Pon pus tard qu' eus matin, ché compagnie d' navigatian a'ri-inne ont décideu d' suspinte leu trafic in résan dé risqu' d' accidint que présinte l' implo d' l' essince. D'jà ché actian dé Socianteu Pétrolieure ont bésseu d' mitan. D'jà dé puits y sont fermeu. J' vos l' répète : ch' eul situatian é catastrophique ... Eud pus, vos n' ignoré pon combin l' situatian Internatianale é tindu. Et bin ? Imagineu qu' eul guerre éclate d'mon, vos vé-yé d' ichi ché résultat. Ch' eul marin-ne, euch' l' aviatian, ché trinsport, ché blindeu. Breuf ! Tot l' Armeu é paralyseu ... >> << Et à quo peut on attribueu ch' brusque quinch'mint surv'nu dins l'qualiteu d'l'essince ? >> <<V'là l' grinde questian ? Ché méthode d' extratian et d' raffinache n' ont pon quinché, in a d' abord pinseu à dé acte eud sabotache ... In a prél'veu dé échintillan à ché pompe, à ché réseurvoèr, à ché batio-chitarne et in lé a soumis à ch'l'analysse ! ... Aucan résultat !!! >> In sé alors décideu à caché l mo-yan d impécheu l' essince d' exploseu. No laboratoère traval'te jour et nuit à résoudre eus problim-me et je ... >> In énorme « BOUM » s'fé intinte eud nouvio. <<Incore in motieur qu' y éclate ! ... A dù qu' j in étos ? Ah, ouais ! Min chef eud laboratoère m'a affirmeu qu' ché arquerche étote su l' po-ant d' aboutir. Y drot m'téléphaneu d' in momint à l' aute pou m dire s' y l' a réussi ... >> Euch téléphane sanne à ch' momint là : « Dring-dring » <<J' sus chertin qu' ché li ! Vos permété ? >> << J' vos in prie ! ... >> <<Allo ? Allo ! Ouais ... Et bin cha y é ? Vos avé réussi ? ... Pon tot à fé ! ... Ouais ... Ouais, J vos ! Ché vrémint argrétape. Infin, cha n'é qu' partie armise ... Comint ? ... S'y fot porsuife eus arquerche ? Mé, nateurell'mint ! Que questian, cha va d'so ! ... Pouquo ? ... >> 4 L' home qu y téléphanne, y lé dins in drôle d état ... Sé loque sont déchiqu'té et ch'batimint dù qu' y s' trouvot y lé in ruine. << Dins ch'cas, M'sieu l'Directeur, y fodrot songeu à installeu d'nouvio laboratoère !!! >> Tintin quitte eul Directeur et arpart à s' mason l' eur contrarieu come à l' habitrude : <<Ch' l' analisse d' essince n'a donneu aucan résultat ... Mé si all' étot falsifieu pa in produit n' léssint aucan-ne trache ? Min viu Milou, eus soèr, in ira s'prom nant du coteu d' ché réseurvoèr. >> Arv'nons à nos Dupont-d, et vé-yons chou qu' y sé passeu pindint ch' timps là. Apreu avoèr été dépin-neu et rintreu à ch' garache, leu chef : <<Du verglass ! ... Y avot du verglass ! In plon mos d' oût. Chou qu' vos m' prindrote pou in ébelé ? J' vas core feure in esseu aveuc vos, mé gare à vos ! Compris ! Allé vérifieu l' préssian dé pneux d' eul votiure d' euch Directeur. >> << Dins l' fond, cha vot miu ! ... In restint au garache, nos apprindrons pus vite inn' séquoi ... >>dit Dupont. <<T' as mis qu' à dire .. >> répand l' aute Dupond <<Eum votiure é prête, Victor ? >> << Dins in instint, M'sieu l' Directeur. In vérifie l' pressian d' vo pneu. >> <<Chutt ! ... Ché l' Directeur . >>dit Dupond <<Et ché novelle, Victor ? Toudis ossi movièsse ? >> <<Hélas ! Ouais. >> <<Ah, ché découragint ! ... In n' parle pus qu' eud guerre. Et dire qu' cha peut éclateu d' in momint à l' aute ... >> Ché Dupont-d, tot à l' accoute, n' ravisote pon euch pneu qu' y gonflot jusqu à feure : « BANG ». Ch' eun étot d' trop pou l' Directeur, et l' chef eud garache y l' a vite fé d' rinvo-yé no deux lascar qu' y filte vite fé. Pis quind viant l'soèr, Tintin s' proman-ne su ché quai. Y l' arrife à proximiteu dé réseurvoèr d' carburin d' la SPEEDOL. 5 Ché là qu'y surprint in home qu'y chiffle apreu in aute, et quind y sont insim-ne : <<Ah, té là ? T' as chou qu' y fot ? >> <<Ouais ! V'là ! Et ti, t' as ché sous ? >> <<Ouais, v'là chi ! >> <<Ok ! ... Alors, teu part eud' mon? >> <<Ouais, le Speedol-Star appareuille dins l' apreu-midi ... >> Sodin, Tintin y é pris d' in éternu'mint : << Aah ... Aaaah ... Aah-tchi-oum. >> Du cop ché deux home y s' approch'te d' l' indrot dù qu' y étot : <<Si queulqu' an nos acoute, sin compte y é bon. >> Dit l'an d'euss, in tenint in révolver à s'mon. Tintin y s' muche eul miu qu' y peut et y l' invot Milou al rinconte dé deux home. << Ah ! Cha n étot qu' in quien ! Tint miu ! ... Jé pu ker cha ! ... N' restons pon chi pus longtimps. In porrot nos surprinte. Allé à l' arvo-yure ! >> << Arvoèr ! Et banne chince ! >> Tintin y s' artourne à s' mason : << Grâce à ti Milou, j' lé équappeu belle ... Et j' cros qu' nos sammes su l' banne piste ! In va téléphaneu à ch' Directeur d' la SPEEDOL. >> << Allo ? ... Ouais ... Ah ! Bonsoèr min cheur Tintin ! ... Inn piste ? ... Vos cro-yé ? ... Vos frotte cha ? ... Mé vos savé, ch' eul guerre peut éclateu d' in jour à l' aute ... Comint qu' vos dites ? ... A bord du Speedol-Star ? ... Come radio-télégraphiste ? ... Ban ! J' vas vir pou arringé cha ... A pus tard. >> Eul lind'mon matan, Tintin s' présinte à ch' port et mante à bord du Speedol-Star et vot l' Cap'tan-ne. << Ah ! Ché vos l' nouvio télégraphiste ? ... Bin jonne , à chou qu' y m 'sin-ne ... >> <<Euh ... Vos savé ... >> <<In verra cha ... Allé à vo poste ! >> Pa ailleurs, in home d' eul Sur'té téléphanne à ché Dupont-d : <<Allo,Dupont ? ... Ah, ché Dupond ! ... Ichi Joubert d'eul Sur'té. Orte d' vos imbarqueu come mat'lot su l' pétrolieu Speedol-Star, in partince pou Khemkhâl, port du Khemed .. . Ché l' bagarre là-bas, intre l' émir Ben Kalish Ezab et l' cheik Bab El Elr, qu'y cache à l' rinverseu. Le Khemed ché in po-ant névralgique à survéilleu ! ... >> <<T' as intindu, Dupont ?>> <<Ouais ! In a juste eul timps d' nos équipeu. 6 In fait d équip'mint, ché Dupont-d sont agoné in marin d' io douche aveuc boueu, gileu d' sauv'tache, puiseutte à crevettes etc ... et lé v'là qu' y monte à bord et qu' y s' adreste à ch' Cap'tan-ne. <<Dites donque, min brafe, indiqué meu à dù qu' y sont no cabin-ne. >> In guise eud répanse, l' Cap'tan-ne lé z' invot aveuc l' pieu au cul dins l' ceursife et pon d' chince pou euss, ché bagache y suiv'te et attéris'te su leu tiète. << Et l' prochanne fos qu' vos m' adres'reu l' parole, vos saré qu' y fot dire « Cap'tan-ne ». Compris ! ... >> «Tooooot » et l' Speedol-Star prind l' larche. <<Queu brute ! ... >> dit Dupont in frottint s' tiète. <<Inn brute, ... J' diros mimme puss : Ché inn véritape brute ! Mé fot arconnète qu' y l'a l' pieu marin. >> Confirme Dupond in frottint s' tiète et s' massint l' bas dé cote. <<Et mint'nint, y s' agit d' eun pon s' feure armarqué et d' eus méleu discrét'mint à ch' l'équipage.>> dit Dupont sins vir qu' euch l' équipage y lé ravisot du haut d' euch pont et rigolote bin d' eul schin-ne. In tiot peu pus tard, deux mat'lots déhimbul'te su l' pont et pas'te à coteu d' eul cabin-ne radio. L' an deux qu' in arconnot car ch' étot ch' ti d' eul veille su l' quai. Y sursaute car y viant d' arconnète Milou. << !!! ... M'parole ! Ché l' quien qu' jé vu hieur soèr !!! Simpe coïncidinche,p't-ête !... Qu' importe, y fot chi ête prudint! J' vas cacheu inn' meilleure muche pou l' colis ! ... >> Intrint dins l' ceursife, y passe à coteu d' eul cabin-ne dé Dupont-d et y vot lé solé eud Dupond qu' y l' é ag'nouillé à ringeu sé affeure. Ch' mat'lot y la arconnu dé solé d'policieu à ché s'minle. Y lé z'accoste. <<Hé, dites donque, vos ... >> <<Hin ? Quo ? Comint ! Perdon ? >> <<Police ? >> D' min-ne l' mat'lot. <<Police Secrète , ouais ! ... Mé ... Comint vos l' savé ? >> << Min métieu ché d' tot savir ! Permété meu d' eum présinteu ... Mac O Connor, de l'Intelligince Service, in missian spéciale. >> Eus serrint l' mon : <<Dupont et Dupond, d' eul Sur'té, égal'mint in missian spéciale. >> <<J' voudros vos d' mindeu in serviche. Porote vos, vos chargeu eud documint secret ? J' cros qu' euj sus arpéré et jé peur qu' in m' lé vole ... >> <<Aveuc plésir cheur collègue. >> Pus tard, apreu leu avoèr remis ché document, euch mat'lot arpart su ch' pont . <<V'là ché fé ! A présint, j'sus trinquille ... >> Et v'là ti pon qu' y quet neu à neu aveuc Milou qu' y prenot l' eur et qu' y l' arluque d'in eur méchint. <<Attind d' ête à KhemKhah, ti et tin mète ! ... Et pis nan ! J' vas y régleu sin compte tot d'suite. >> 7 Tintin y l' accoute l' radio : « In signale d' importint mouv'mint d' troupe à ché frontieure ... L' Présidint du Conseil a annanceu ch' matin à l' Quim-me que l' situatian étot grafe. Mé qu'eul Gouvernemint avot pris tot ché m'sure néchésseure ... » <<Saprischti ! Eus z'affeure n' ont pon l' eur d' s' arringeu. Y suffirot d' inn' étinceulle pou mette eul fu au poute ... Mé à dù qu' y lé Milou ? J' eun l' intinds pus ... Milou, ... Miiiilou ? ... Tians ! Y lé sorti. >> In effeu, Milou y étot à l' cour et ch' mat'lot y li a prépareu in pièche . Y l' avot accrocheu in oche à inn' fichelle et y saquot d'sus pou feure v'nir Milou derrian l' cabin-ne. Mal y a in pris, y connéssot pon Milou et y a du sin chalut in plongint dins inn' écoutille. Ché in intindint ché cris d' euch l' home et d' Milou, qu' Tintin é sorti et a vu ch' mat'lot qui queurrot et qu' y a pu s' jeté dins ch' l' écoutille, Milou n' a pon su et sé assomeu conte. Tintin voulot s'ceurir ch' mat'lot, mé y sé fé app'leu pa ch' Cap'tan-ne qu' y avot in méssache à invo-yé : <<Hello, l' radio ? Vos téléphané à l' planeute Mars ? V'là chi in messache à trinsmette à l' Compagnie ! J' attinds l' répanse ! ... >> <<M' v'là, Cap'tan-ne !
>> Pis
y sin va trinsmette sin messache : « Tic tic tic tic tic tic
tic. » <<Ch' eul guerre ... J'eun peux m' impécheu d' y songeu ... Cha s'rot horripe ... Pourvu ché gouvernemints arriv'te à s' intinte ! ... « Tut tut tut tut tut » Ah ! V'là répanse d' eul compagnie ... J' arvians tot d'suite Milou ! ... Léchint là Milou à sin pieu d' caïère, y porte sin messache à ch' Cap'tan-ne et l' v'là déhors : Tians, y fé d'jà noèr ... Cha passe vite.>> <<Ché l' répanse d' eul compagnie ? ... Ban merchi ... >> <<B'soèr Cap'tan-ne>> Tintin arviant veurs eus cabin-ne et y vot l' porte ouveurte : << Tians ! Y m' sin-not pourtint l' avoèr fermeu l' porte ...>> Y rinte et y l' aperçot in morcio d' ouate pa-tière, y l' rammache et y l' sint : <<In timpon d' ouate, imbibeu d'chloroforme ! In a inl'vé Milou ! ... >> Y arseurt et y l' appeule : << Milou ? ... Miiilou ? >> Y l' intind in grind « PLOUFF », y queurt dù qu' y l' a intindu ch' bruit, pinsint qu' in a arrué Milou à l' io. Et là !
A SUIVRE 8 |