HERGE

 

Les Aventures de TINTIN

En PATOIS du Cambrésis

 

 

 

CHE PINDERLIOTS D'EUL CASTAFIORE

 

Par

HECTOR MELON D'AUBIER 

  

 

CHE PINDERLIOTS D'EUL CASTAFIORE

 

Par in bio matan d'eul' fin du mos d'avril, euch'Cap'tanne Haddock, Tintin et ch'quien Milou y s'prom'note dins ch'eul'foreu près du Catio eud'MOULINSART.

          << Ah, ch'printimps! Eul mos d'meu! Ch'eul nature, dins tout s'fréqueur d'arnovell'mint!  >> s'esclinme Haddock, et poursuivint dins s'n'hématopeu.

          << Ché gazoullistiots monio! Ché fleurs dé bos! Et pis, euch ban sintimint d'eul fraique tière! Respir' meu cha à plin pouman, Tintin!  Si in pouvot mette euch n'eur pur chi in boutelle, in l'buvrot à ch'goulot!  >>

Tintin l'acoute, mé sodin eus narine all'freumi.Y l'a l'eur eud'sintir queut'cosse.

<< In fé d'bio sintimint, euch'né pon l'membrette qu'in sint chi! >>

<< Tians! Vos avé raisan! >> Euch Cap'tanne y l'arnifle à sin tour.

Leu parcours y lé z a im'neu preu d'in dépotoère d'ordures dins l'long'mint d'eul'foreu.

     <<Bin! Rin d'étanint à cha! In é tout preu d'euch'treu à dù qu'in  répint tout ché fien dé rues du Cinton! Queu brin ! >>

In peu pu long, y a dé bohémians qui cimpe. Chou qui fé dire Tintin à ch'Cap'tanne.

<< Dé romanos!>>

          <<Euj'veu, min n'veu! Y a dé ti qu'y ont l'eur d'ête attireu pas ch'eul'peste!   Ché à n'pon croère!>>

          Quittint eul'sintieu qu'y suivote, y s'in vont à traveurs ché bos in directian d'euch'cimp'mint.

          << Y s'plais'te dins l'brin, ché zigoto là! Mé queulle affeure! >>  N'peut s'impécheu d'critiqueu euch'Cap'tanne

          << Chut! Acouté ! In dirot qu'y a in infint qui bré ichi tot près ! >>

          << Bou-ouh! >> Intint-on.

          <<Inn' tiote bohémianne! >> Qu'y dit Tintin.

<< Bou-ou-ouh! >> Qu'all' fé d'pus beule.

<< All' ara queuru trop lon d'ché baraque qu'in viant d'vir! >>

Pis

          << B'jour, tiote! Pouquo teu brè come cha? T'a perdu tin qu'min? Allé! Eun' trin-ne pon insin! Comint qu'ché ti qu'in t'appeul' ? ...  Mi, ché Tintin! Et ti? >>

<< Mé vas-tu répant', nom dé diousse ! >> Dit euch'Cap'tanne in l'sésissint pa s'n'épole.

      << Arreut' eud'brère, nom d'zo! In n'va pon t'avaleu! >>

          << Douch'mint, Cap'tanne! >>

          Surpris, eul'tiote, all'pousse in cri d'épouvinte

<< Hi-i-i-i ! >>

Et séssissint l'mon d'euch'Cap'tanne, all' li mord in bon cop.

          << Hangg ! >>

          << Aouh! >> Pouss' eul'Cap'tanne Haddock

 

1

 

Pis all' s'infuit in queurrint intre ché z'apes.

          << Sacreu mi-iard eud'g'vio!

          Sal'tiote morveuse! Arrèt' teu qu'euj't'attrappe!

          Non mé ravisse meu cha! All' m'a mordu au sing, euch't'archelle! >>

          << Ché vrè! Mé vos, vos li aveu  foutu inn'drol' eud'troule. >>

Sodin! V'là ti pon qu'euch Milou y s'mé à abo-yeu.

<< Quo qu'y s'pass' incor? >>

In grimpint quate à quate intre ché z'apes, dins l'directian t'ché abomint d'euch'Milou, y l'apersote!

          << Oh ! Eul'pofe tiote!>>

<< Pofe tiote? >> questianne euch'Cap'tanne

<< Euj'cros bin qu'all'a chopeu dins ché ronche et s'tiète all'a cogneu su inn'grosse rachin-ne. >>

Eul'tiote, all'étot come qui dirot dins ché vape.

<< Té fort amocheu ? Bé nan! Teu n'sin-gne minme pon. T'aras jusse inn'bioche su tin fran ! >>

<< Pofe tiote va !

Eun't'in fé pon, in va t'arconduire à mo d'chéparrint. Teu s'ras bintôt armis. >>

In tintint d'eul'feure rire, eul'Cap'tanne y li fé :

« Kilikilikili ! »

Tout in li fésint in sin-gne eud'marionette aveuc eus'mon.

Pis lé v'là arparti à travers bos.

<< Cha va no tiote? >> D'min-ne Tintin.

Eul'tiote, all'li fé sin-ne d'eus'tiète qu'à ouais.

Inn'pair' eud'minutes pus tard.

<< Mamma!>> In apercevint s'meure.

<< Miarka! >> Répand  s'meure in lé vé-yint arriveu.

<< Dire qu'y a dé gins qui vif'te au mitan d'in pareul abitaque.>> Ne peut s'impécheu d'critiqueu, incor' inn' fos, eul'Cap'tanne.

<< Queu malheur! >> Li répond Tintin.

Pis lé v'là arriveu devint in attroup'mint d'eul'famile à l'tiote.

<< Bonjour à tartous! >> Sort polimint l'Cap'tanne.

Pis poursuivint.

<< In a trouveu ch'eul'tiote dins ch'bos. A m'mote qu'all's'étot perdu.

In nos vé-yint, all a foutu l'cimp. Pis, all'a bourleu s'tiète su inn' grosse rachin-ne.

Et, v là! In vos l'ramin-ne jusqu'ichi. >>

 

2

 

Tout ché gins y z'avot' l'eur heureux.

Inn'vieille finme all's'approche eud'no Cap'tanne.

<< Ti, brafe home! Mi dire à ti-z'aute bon'avinture. Ti mètt' dé sous dins t'mon ! >>

<< Nan, nan, nan. Pon d'cha, Lisette !

Et pis, à m'n'ideu qu'y s'rot peut'ête bon d'feure vir l'infint à in mèd'cin. >>

<< In docteur! Vos n y êtes pus! Chou qu' vos pinseu qu'in a dé sous pou s'pa-yeu in docteur.>> Li répond euch'ti qui sin-ne ête sin père à l'tiote.

<< Acoute, M'sieu! Mi dire à ti-z'aute eul bann'avinture. Ti mette dé sous dins t'mon.>> arprint eul'vieille finme.

<< Nan,nan! Léché meu trinquile! Espèce d'arpielle.>>

A s'mé alors à pousseu in crin cri :

<< Ooooh!>>

        << Et, alors! Quo qu'y vos prind ? Vos n'y êtes pus ! >>

<< Ti, mordu! >>

<<Ché tout chou qu'à trouveu. Mi aveuc euj'saros vos dire eul bann' avinture.>>

<< Ti faire attintian à ti!  Sinan ti accident ! 

Mé pon grafe. Ti bétot novelle votiure!     Oooh!

Mi core vire beulle Madin-me étringère. Elle v'nir vir ti-z'aute!

Oooh! Elle avir bijoux magninfiques. Et ... Oooh! Grind malheur! ... >>

<< Et quo incor ? >>

<<Bijoux, pffft! Disparus! Involeu! Ti mette inn'pair' eud'sous dins t'mon et mi dire à ti incor bécop d'affeur'. >>

Nan, nan, naaaaaaaaan! Y d'a asseu pou achteur. Pis lach'eum'mon, vingt diousse! >>

<< In tiot peu d argint, s'y te plé ! Chinon grind malheur pou ti , j't'eul dis. Chinon bijoux partis ! >>

<< Mi ossi, j' sus partis ! Termineu ! L'banne avinture ! Dequint d' min dos ! ...

V'là, arvoèr, et sognié bin ch'tiot inge ! Mé chi jé in conseuil à vos donneu, ché alleu vos installeu élleurs qu'sus ch' terrin rimpli d'ordures. Ché très malson et ... >>

<< P't-ête qu M'sieu s'imagin-ne queu ch't'indrot ché nos qu'in la chosi ! M'sieu y pinse qu'cha nos plé d'vife aveuc ché ordures ! >>

<< Ch't'à dire que .... >>

In aute bohémian viant à sin tour.

      << Té teu Matéo, lèche me parleu aveuc eus gadjo ... >>

<< In gadjo ? Mi ? >>

<< Ché insin qu'in appeule ch'euss qu' y n'sont pon tzigin- nes ...

 

3

 

V'là, in né chi arriveu hieur, aveuc in home malate et l'police nos a permis d'cimpeu, mé seul'mint à ch't'indrot. >>

<< Ah ! Ché come cha ! ...

Et bin, vos allé vos installeu aute part ! Ché mi qu'y vos l'dit . Y a inn' beulle pâture preu d'euch  catio, au bord d inn' rivieure. Vos pové y v'nir quind vos volé ! Intindu ! ...

Obligeu dé êtes humans à vife dins in pareul dépotoère : ché révoltint >>

<< Vos avé bin fé d'lé inviteu Cap'tanne. >>

 

Euch  Cap'tanne et ch'Tintin y z'arrife à ch'catio. In intrint dins l'corridor, y z'intinte in gros « BOUM ».

Ché  l'professeu Tourn'sol qu'y é quéhu in bas d' l'escalieu dù qu'y avot inn' marche qu' y étot casseu.

<< Min pofe Tryphon ! Rin d' casseu ? >> Li d'min-ne l' Cap'tanne tout désoleu.

L' professeu tout d'échervelé l' y répond :

<<Si fé, si fé ! In morcio d' au moinse vingt chintimète.>>

<< Ch' t' pourcheulle  eud marche! Toudis pon répareu. Quind donc qu' y verra ch'teu marbrieu d' malheur ? >>

<<J y é core téléphaneu mintes fos, M'sieu. A chaque fos, y promeut d'v'nir, mé ... ! >> Qu' y dit Nestor.

<< Queu prometteu d'bonjour ! J' vas vos montreu, mi, comint qu' in s' y prind ! ...

Allo, Allo ? M'sieu Boultu ? ... Comint ! Ch' né pon M'sieu Boultu ? ... >>

A l'aute bout d'euch fil :

<< Nan M'sieu ! Ché l'bouch'rie Sanzot ichi ! ... Ouais M'sieu ... Nan M'sieu ! ... Pon d'quo, M'sieu. >>

L' Cap'anne claque ch' téléphane, pis y arcomposse in aute noméro.

<<Allo, Ché M'sieu Boultu ? >>

<< Ouais ché mi ! ... Ah, ouais M'sieu ... Ouais j' sé ... Je ... Ouais j'étot débordeu d'traval ... Ouais j' comprins, ché immerdint ... Ouais, et ding'reux ... Ouais, ouais ... Quind ? J' n'in sé trop rin ! ... Bin d'mon p't-ête ... Ché cha, à l'premian hoère ... Vos pové compteu su mi ... Arvoèr M'sieu ! >>

<< Et v'là comint quind fé m' n'ami . In tiot peu d'ferm'té, vingt diousse !

Y s'ra chi d'mon matan, vos l'avé intindu come mi ?>>

<< Diu vos intinte l' y ossi, M'sieu ! >> répand Nestor.

 

Pis nos tros z' amis ch' installe dins l' salon, l' Cap'tanne y s' verche in whisky.

<< Ah ! Achteur l'apéro ! Euch grind t' eur cha donne so. Dé bionnes novelle Tintin ? >> Qu' y lisot sin courrieu.

<< Tchang y m' écrit d' Londres. Tout va bin et y vos adreusse sin méilleur souv'nir. >>

<< Queul ginti garchon, eus Tchang ! >>

<< Ouais ! Y a inn aute lette signeu - vos n'd'vi-n'rant jinmeu ? - ... Bianca Castafiore ! >>

<< Bi-inca Castafiore ! Ha ! Ha ! Ha ! Euch rossignanle Milin-neu !

Quintint : Aaaaaa ! Euj riiiiis d'eum  vir chi bélotte in s'miroèèèèèère ... >>

 

4

 

<< Tians ! In va chi avoèr d' l' orage. >> Prédit Tourn'sol.

         <<Et quo qu' all nos racante eud bio, ch' t' aimape finme ? >>

<<Nan ! Cha s'quinlme, qu' in dirot ! >> Arsort Tourn'sol

<< Chou qu' all dit : Eus n' arriveu pou d' mon ! >>

<< La Castafiore ?!! D' mon !!! Ichi ?!! Ché inn' plésint'rie, Tintin ?>>

<<Qué nan ! Liseu vos minme. >>

Prenint ch' eul lette :

« Min jonne ami. Y a bin longtimps d'jà , et patati et patata,  in tiot séjour dins min pays, et patati et patata, eun' pu vir ché jornalisse, et patati et patata. Pourros-je, tot simplémint, bin sûr, m' inviteu à ch' catio d' Moulinsart, Et patati et patata, j' s'rai là l' 17 !!! » Mille mi-ions d' mille mi-iard de g'vio ! ...

Ch' eul Castafiore ichi !!! Dites me pon qu' euch né pon vrè ? Mé cha va ête l' apocalype. >>

<< Euh ! Y a core in tiot mot pou vos à l' fin. >>

<< Mille amitieu à ch' Cap'tanne Bartock ...

Haddock, M'dame la Castafiore ! ...

Haddock, mille tonneure d' zo ...

Nestor !!! >>

<<Ouais, M'sieu ! >>

<<Nestor, teu fé m' valoche tot d' suite ! Y fot qu''euj  so débuqué dins in hoère. >>

<<Heu ! Bin M 'sieu ... >>

Pis Nestor y file in bartonnint in n' sarat jinmeu quo qu' y pinsot !

<< Qué nan, min fiu ! Ché pon la pin-ne eud m'art'nir, j' liave l' incre. >>

« BOUM ! »

Ché Nestor qu' y loupe eul  marche d' escalieu à sin tour.

<< Euh ! Ché core ch' eul marche , M'sieu ! >>

<Mé infin ! Tonneure d'Brest ! Vos savé qu' all é casseu ch' t' marche, euj'   m'esquinte à l' crieu sous lé tot ! >>

<< Euh ! Ouais, M'sieu ! J' cros qu' in a sonneu M'sieu. >>

« DONG !»

<< Laiche cha , j' vas euvri mi minme. Occeupe teu d' mé valoche.>>

Milou qu' y filot eul  parfeu amour aveuc euch cat.

<Dommache qu' y s' in va ! Li pis la Castafiore ch' arot fé d' s' étinchelles .>>

<<In télégrinme pus vos Tintin. Qu' y ché ! Ché p't-ête Bi-inca Catastrophe qu' y a eu in impèch'mint. ...Et, bin ? >>

<< Ché bin d' eul , just'mint ! ...

 

5

 

Mille et inn'xcuse -stop- n' peu pon v'nir ! >>

<< Magnifinque ...

Hourra ! >> Qu' y in rue eul vière qu' y v'not d' eus verseu en l' eur et dont l' cont'nint arqué su l' Professeu :

<< Saperlipopeute ! J' aros pon du sortir sins min parapleuve. >>

L' Cap'tanne in dinsint :

<< All  n' viant pon, viu frère ! Tralalal lala !>>

<< Ouais ! Ch' bio timps chi pouvot pon dureu ... >> atteuste l' Professeu.

<< Nestor ! Nestor !!! Léché mé bagaches - stop- j' eun  pars pus ! >>

<<Mé, l' interrompt Tintin, y a inn'  suite. >>

<< Quo ? >>

<< Mille xcuses  - stop- n' peurons v'nir l' 17 - stop - j' s' ré là l' 16 - stop - Amitieu à tartous. Bianca. >>

<< Quo ? !!! ...

L' 16 ! L' 16 ! Mé ché aujordhui l' 16 ! >>

<< Ché cha Cap'tanne. >>

Volint boère sin whisky, y né tot étonnint d' vir sin vière vite. Sur ce :

<< Brinle-bas d' cambat !! Tartous su l' pant. In s' in va ! >>

<< Mé, à dù Cap'tanne ? >>

<<J' n' in sé nan ! N' importe dù ! A Milin, tians ! J' n' y é jameu éteu, d' poère d' quéhir eud sus. >>

<< Mé .... >> tinte d' insisteu Tintin.

<< Nestor ! Nestor ! Mé valoches ! J' m'in va tot d'suite. >>

« BA DA DA BOUM ! »

<< Min Diu, Cap'tanne ! >> s éclin-me Tintin

<< Sacreu d' mille mi-iard d' mille mi-ions d' g' veu à vapoère ! >>

Euch  Cap'tanne y v'not d' loupeu ch' eul marche à sin tour, tell'mint y l' étot infourcheu dins s'n'élin. Tintin y li donne in cop d' mon pou s' arl'vé.

<<Ch't' marche, tonneure de Brest, ch' t' salop'rie d' marche. Ah ! Chi j' t'nos ichi ch' t' arracheu d' dints d' marbrieu ....>>

<< Rin d' casseu, quind minme ? >>

<< Nan ! Heureus'mint ! Mé j aros tout ossi bin pu m' feure inn'  intorse !>>

S' ardressint :

<<Aouh ! >>

Inn hoère pus tard, euch docteur y l' étot là.

 

6

 

<< Inn' solite intorse, min fiu. Aveuc inn' arruchure d' vos tindons.

J' arviandré d' mon vos mètte in plâte. >>

<< In plâte ?!! Pou inn' intorse ? Mé docteur, j' fous l' cimps t'taleur minme pou l' Italie.>>

Pou l' Italie ! Vos n' y êtes pu !

Arpos absolu pindint quinse jours. Vos l' avé équapeu beulle, vos arrote pu avir inn'  guinme eud'casseu ...

Et pis, vos devrote répareu ch' t' marche, in li-z'aute pourrot avir moinse eud chince qué vos. Arvoèr ! >>

<< Arvoèr docteur !  ...

Pa s'qu' y troufe qu' jé d' eul chince, mi ! Ah !Ah ! J' in ris ! >> In s' préparint inn'  pipe.

Sodin !!!

<<Coucou ! >>

L' Cap'anne y n' in peurd eus pipe et sin touback .

<<B'jour Cap'tanne Kappock ! Ah, j' sus continte d' vos vir ! >>

<< Comint qu'vos ête intreu ?>>

     << Mé par l' Sint  Vieurche ! Quo qu' y vos é arriveu ? >>

<< Inn'  intorse !. Mé comint ête vos intreu ??? >> insistint

<< Au momint qu' in arrivot, Tintin sortot aveuc in home. In n' a pon eu b'soin d' sonneu. >>

<< Comint cha « IN » , vos n' êtes pon v'nu tout seu ? >>

<<Bé nan ! Fésint ché présintatian . Irma, eum  n' habileusse, vo-yache toudis aveuc mi. Insin que m' n' accompagnateu, Igor Wagner qui , bin sûr, m' accompin-gne toudis. Ah !Ah !Ah ! >>

<< Permété-meu M'dame, d' vos présinteu no viel ami l' Professeu que ... >>

<<Oh ! J' sus continte, absolumint continte d' vir l' célépe sportif qui mont'  si bin in ballan.>>

<< Mé hommaches, M'dame ! J' sus parfait'mint heureux mi ossi d' feure connéssince aveuc inn'  grinde artiste, inn'  artiste formidape qui ...>>

<< Professeur, vos allé m' feure rouchir ! >>

<< J' l' espère d' tot min coère, M'dame. Tintin m' a souvint parleu d' vos tablio, à dù qu' eul' Grâce dé lin-gnes s' allieu à ch' l' hardieusecoleuris. Y paraitrot qu' vos portreu sont d' inn'  arsimblince étonninte .>>

<< Nestor, y faudrot am'neu M'dame à s'quinme.>>

<< Bin, M'sieu. >>

<<Bin volontieu ! avint, ... Euh ... Irma, a dù qu' y é ...

7

 

Euh, ch' eul tiote séquoi  pou l' Cap'tanne Kaddock ! >>

<< Dins l' taxi, M'dame. J' vas l' querre tot d'suite. >>

      << J' pinsos ... Euh ... J' eum  sus dit qu' in viu leu d' mer come vos, devrot s' sintir bin seu dins s' barquette ... >>

<< Euh ... Ché ginti à vos, mé ... >>

<< Du cop, jé songeu à vos offrir ... Euh ...>>

<< V'là chi , M'dame. >>

<< Euch  Perroqueu des Inles, qu' y s'ra pou vos, eul pus fidèle dé compagnans ...>>

     << Je ... Queu surpriche ! Cha pou inn' surpriche ché inn'  surpriche ... Euh ... Rin n' arot pu m' rinte pus heureux. >>

<< J' eun étot sûr ! ...

Ohé Irma, mété leu su sin perchoère. >>

<< Ouais M'dame ! >>

Milou  à ch' cat :

<<Mi, j' eun  supporte pon ché biètes qu' y parl'te. >>

Pindint tout cha, y avot inn'  auto qu' all  s' étot gareu d'vint l' intreu d'euch  catio. L' an dé occupints :

<<Cha y é ! Y z' ont déquarqueu ché bagaches. Ché donc ichi qu' all  ch' installe. A l' ouvrache, Gino.>>

Arv'nons à ch' Cap'tanne et la Castafiore.

<<Y s' appeule Coco : Ché in nom qu'y fé italiens. Et y é si ginti.

          Ché ti pon vré qu' teu l' as  ker, euch Cap'tanne Martock ? ...

Careusseu-le, Cap'tanne ! Fot pon n' avir poère, y frot pon d' mal à inn' mouque. >>

<< Ouais, ché à vir : Kili, kili, kili, kili. >> Qu' y li fé aveuc sin dot in d'sous d' sin bec.

<<  Ché marveilleux! Y vos à d'jà ker, li ossi. Ah , ché animio y z'ont in instint qu' y n' trompe pon. Qu' y s' arsin-ne, s' assin-ne. >>

<< Ah, vos cro-yé ? >>

<< « CRÔ ! » >> qu' y fé ch' perroqueu, et d' in cop d' in seu y croque euch dot du Cap'tanne.

<< « AOUWWWW ! »  Qu' y l' hurle. ...

Mille mi-ions d mille mi-iard eud g'weu ! Espace eud canibale ! Bachi Bouzouck ! Ravachol. >>

<< Allôôô ! J acou-ou-te !. >> sort ch' Coco

       << Eud grâce, Cap'tanne kosack, pon d' gros mot. Ch' té pofe tiot s'rot capape d'lé répéteu. Moutré meu vo dot ...

Cha ché rin ! In tiot bobo d' rin du tout !

Irmaaa ! Ch' eul trouche d' pharmachie, siouplé ! >>

<< V'là chi ch' eul trouche, M'dame... et ... >>

<< Ah ! Ché vrè, j' oublios ! Min tiot Tintin, permétté meu d' vos offrir  euch tiot présint ... >>

Ché in disque trinte tros tour qu' all  li offe.

<< Euch l' Eur d' ché Bijoux ! >> lit tintin sus ch' disque .

<< V'là qu' y é feu ! Qu' all dit apreu avoèr termineu d' sogneu Haddock. Inn  beule tiote poupeu pou consoleu l' pofe marin. >>

<< J' vos armarchie d' tot min coère, M'dame. Ché bin aimape d' eun  pon m' avir oublieu. >> dit Tintin.

<< Du tout, du tout ! Jé pinseu qu' cha vos rappeul'rot no premian rinconte in Syldavie. Chou qu' vos vos in rapp'leu ? >>

<< Et comint ! Ché là qu' j' vos é intindu quinteu pou l' premian fos l' Eur d' ché Bijoux, d' Faust eud Gounot. >>

<< Ché vrè ! Ch' t'Eur dé Bijoux qui ...

              CIEL ! ME PINDERLIOTS ! >>

 

A  SUIVRE

 

8