HERGE Les Aventures de TINTIN En PATOIS du Cambrésis EUCH'TINTIN ACH'CONGO Par HECTOR MELON D'AUBIER

TINTIN A CH'CONGO

Tintin s'appreute à prin-ne euch tron. Deux policieu in civil l'obseurve alors qu'y danne ché adiu à in groupe d'jornalisse et d'jonne gins.

<<Y parétrot qu'ché in jonne arporteur qu'y part pou l'Afrique. >> Dit l'an dé policieu.

<<Arvoèr, min cher Tintin. Bon vo-yache et banne chince. >> L'y diste ché gins.

Milou fé d'minme aveuc inn' meute eud'quien.

<<Ouais, j'eun'avos asseu de m'neu inn'tiote vie monotone. Alors jé décideu d'allé chasseu l'lion. >>

Pis ché lé adiu qu'in y mont'te dins ch'tron et qu'y s'in va.

Queuqu'hoère pus tard. Y s'imbarqu'te à bord d'in batio. In jonne serveur noèr leu indique leu cabin-ne.

<<V'là chi vo cabin-ne, Missié ! >>

<<Très bin, j't'armarcie tiot. >>

Milou y fé l'tour d'eul cabin-ne et vot inn'arégneu :

<<Saprischti ! Inn'arégneu. J'né pon quer cha mi. Surtout qu'in dit : Arégneu du matan, chagran. >>

All'intre dins l'malle à vêtemints.

<<Vé-yons dù qu'all s'muche ch'te vilan-ne biète ? Zut ! Euj' fé querre in miroir. Chept t'ins d'malhoère incor !

Sins compter chou qu'y va dire Tintin !

Ah ! V'là m'moustiqueur. Grâce à cheulle chi j'vas pouvir dormir trinquill'mint. Sins crainte ché cousin !

Diape ! Queu dé grosses cartouches ! Ché sur mint pou chasseu l lion cha ! >>

Sodin, Milou intind crieu :

<<Chauve qu' y peut !! In coule !! >>

<<Vite, vite ! Eum boueu d' sauvetache ? >>

Quachint à l'agrippeu, cheulle chi quét su s'tiète. Eud peur y sort in queurint :

<< Impossipe d'eum servir d'in ingin parel ! >>

<< Chauve qu'y peut ! >> Qu'y l'intind core.

Et y s'roufe neu à neu aveuc in perroqueu.

<< ? >>

<< ?>>

<<In perroqueu ! Cha né qu'in stupite perroqueu ! >>

<<Chauve qu'y peut ! >> Qu'y dit core inn' fos

<<Stupide animal ! >> Qu'y li dit Milou.

<< ? >> Et fonchint su Milou, y li mord eus'queue

<< Wououahah !

1

Cha m' n'ami teu va m eul payé quer !! >>

<< Chauve qu'y peut !! >> Qu'y l'ardit core.

Et Milou y fonce su li. Les deux animal comminch'te alors inn'batalle mémorape, qu'y fé aqueurir Tintin.

<< Mé quo qu'y s'passe dins m'cabin-ne ? >>

Là y vot l'carnache et sépare ché deux bestioles.

<< Milou, malhéreux ! Teu m'in fout chi inn' ! As-tu songeu à ch'eul psittacose ? >>

<<Jacquot y lé contint. >> Sort core euch perroqueu in partint.

<< Y lé parti ? Dis-meu Tintin, cros-tu qu' euj' pourros l'attrappeu ch'eul psittacose ? >>

<< In verra cha d'mon ! >>

Eul lind'mon matan, Milou y vot qu'eus queue all a infleu. Y l'in braie, ch'pofe quien.

<<Min pofe Milou, come teu v'là chi mal in point ! Vite in va alleu vir euch méd'cin d'bord. >>

<<Y comminche bin, min vo-yache. >>

Ché l'méd'cin :

<< Y l'a éteu mordu per in perroqueu. Chou qu' ... Qu'in pinsé vos, docteur ? D'eul psittacose ? >>

<< P't-ête. In va vir ! >>

Eul méd'cin y l'examine pis y sort sin diagnostic :

<< Hem ! ... Ouais, j' vos ! ... Nan, rin d'grafe ! In va li feure inn' tiote incisian pou arsaquer ch'mové !

J arvians ! >>

<< Allons, Milou ! Du crin ! Teu verras, cha s'ra vite feu. >>

<<Sos trinquille Tintin ! J'eun né vu d'aute. >> Finissint d'dire cha, y s'ardrèche su sin séant. Y viant d'vir in ouvrieu intreu aveuc inn'scie à s'mon.

<< Eh, bin ! Milou quo qu't'as ? >> L'y d'min-ne Tintin qu'l'avot pon core vu.

<<Cha jameu ! Putôt mourir qu'ête décopeu ! >> In s'sauvint et in allint s'cacheu sous ch'eul tape. Ché alors qu'Tintin vot ch'l'home, du cop y va rassureu Milou.

<<Mé né pon peur come cha, grind sio ! Teu vos bin qu'ché l'carpintieu du bord. Ch'né pon li qu'y va t'opéreu, vé-yons !

Allé, sos résonape achteur …...! ... >>

<<Oh ! Ch'né pon qu' jé eu peur. Seul'mint je ... Il ... Infin ... Teu comprinds ? >>

Pis ch'méd'cin arviant aveuc in tiot bistouri :

<< V là, j' sus à vos tot d'suite !

Sos bin sache, min tiot quien. Cha n's'ra pon long. >>

<< WOUAAAAAAAAAH ! >>

2

<< V'là, ché tout ! ... Ché fini ! Ché fini ! .....

Vos vé-yé, cha n'a pon dureu lotimps. >> Apreu l'y avoèr mi in pins mint et inn'bind'lette à s'queue.

<<Tralalallere ! Me v'là guéri ! >> Cante Milou

<< J vos armarcie pon docteur ! Vos avé sauvé Milou. >>

<<Arvoèr. Et surtout éviteu ch'perroqueu ! >>

<<So-yé trinquille ! >>

Su ché dernian mots là, ch'docteur arfarme eul porte avint qu' Milou y sot sortit complét'mint. Et y écrasse eus queue intre l'bati et l'porte.

<< Wouahaah !>>

<<Oh ! Perdon, min pofe Milou ! Décidémint teu n' as pon d'chince. ...

Allons, vians ! In va feure inn'tiote prom'nade su l'pont. >>

Minque eud pot, ch'perroqueu y lé core là au pieu d'l'escalieu :

<<Chauve qu'y peut ! ... Jacko y lé contint ! ... >>

<<Li ! Incore toudis li ! ... Ch't fos j'vas chi feure in malheur ! >>

Milou, vians chi Milou ! >>

Milou y l'coute pon. Y queurt apreu ch'perroqueu qu'y connot bin l'batio. Et fini per s'arréteu su inn' écoutille :

<<Jackot y lé contint !>>

<< Cros-meu min fiu, teu va passeu in mové quoart d'hoère !>>

Jacko cantinue d'l'attiqueu et Milou d'colère y fance su li qu'y s invole à ch'momint là. Milou dins s'n'élin y l'intre dins ch'l'écoutille, y déquint l'queminée et y l'atterri su l'tiète d'in mat'lot. Ch'ti chi in colère y prind inn'barre eud'bos et va pou assomeu Milou.

<<Saprischti ! Ch'te sale cabot, y l'é capape d'eum feure arpéré. J'm'in vas l'assomeu in douce. >>

<<Quo qu'y fé chi, ch'teu bonhome ? Cha ma l'eur d'ête in passageu clindestan.

Mé y lé fou. Y m'buque eud sus. >>

Milou in tintint d'éviteu ché cop d'baton y saute pa in hublot ouveurt et quét à l'io :

<<Horreur ! J'vas chi m'no-yé ! >>

<<Cha y é ! J'in sus débarrasseu. >>

Mé Tintin qu'y cachot apreu li a intindu l'plouf qu'y l'a fé. Y n'perd pon l'nord :

<<In home à la mer ! >> Qu'y crie.

3

<< Stoppé ché machin-ne ! >> ordonne ch'Cap'tan-ne

<< Vite arrouons à Milou ch' teu cape métallique  ...

Tians teu bin, Milou. J'as t'isseu su ch'pont ! ...

Attintian à ti, v'là in pisson torpille !!! >>

Trop tard ! Euch pisson torpille y l'a mordu Milou à s'queue, du cop, y lâche eul cape et Tintin y prind in cop d'jus et l'in quét à l'rinverse in lachint sin cape. In mat'lot qu'y a vu la scène, arrife aveuc inn'boueu :

<<Aie ! Y in a attrapeu déquarque électrique ! Cha y in a pon ête bon ! ...

Attrape Missié l'quien ! >> In linçint ch'eul boueu.

Mé cheulle chi all quét jusse su s'tiète. Pofe quien !

Y l' assommeu et s'infonce dans l'io. Tintin arviant à li, eus premian pinsée ché pou sin quien :

<<Milou ! Dù qu'y lé Milou ? >> Qu' y d'min-ne à ch' mat'lot.

<< Y viant d'couleu à pic, Missié ! >>

<<Y fot l'sauveu à tot prix !>>

<< Ti, pon plongeu, Missié, y a chi bocop d' requins ! >>

N'l'acoutint pon, Tintin plonge à l'arquerche eud Milou. Y l'vot just à timps. In r'quin y l'arrivot su li. In tintint d'armonteu, y s' fé agrippeu à sin pieu pa ch' requin qu' y n'a pu qu'avaleu sin solé. 

<< Ouf ! Y étot timps ! ...

Attentian ! L'arv'là al charge ! >>

Tintin qu'y s'tot agrippeu à l' boueu, y li in invot in cop su sin neu. Ch' requin y mord ch' eul boueu et y n'avale inn' mitan. In profitint, Tintin s'dépèche eun' nageu veurs ch'eul chaloupe qu'euch batio y l'avot mis à l io.

Ché mat lot récupeure Tintin et Milou dins l'coma. Arriveu su l'batio, ch' méd'cin y é preu d'éxamineu l'quien :

<< Sin coèr y bat-y core ? Y n'é pon mort, s'pon ?  ... Répandé meu Docteur ? >>

<< Tésé-vos donc ! Euj' n'intinds pon sin coèr qu'y bat ! ...

Cha va y vit ! >>

<< Qué bonhoèr !! >>

Mé Milou né pon core réveilleu !

<<In va y pratiqueu ch'eul respiratian artificielle et dins queuqu' s'intint, vos véré qu' y l' arprindra connéssince ... >>

Tintin et ch'Docteur y qu'mminche ché mouv'mints et in tiot momint pus tard, pon d'minque, Milou arviant à li.

4

<<Et bin, min viu Milou, t'arvians d'lon !

Et mint nint, in va kingeu d' habits. Insuite, in prindras in r'pos bin mériteu. >>

Et in lé z'artroufe tot lé deux allongeu l'an su in transat, et l'aute su inn'couverture à minme eul so.

Queuque jours ont passeu, eul traverseu touche à s'fin. Lé v'là arriveu à ch'port dù qu'y drote déquinte.

<<Et v'là l Afrique, min brafe Milou ! ... >>

A ch'port, ché indigin-ne noèr eud pio, arwette ossi ch'batio arriveu.

<<Ti vos ch'grind batio, Boule de Neige ? Et bin, cha y in a Tintin et Milou eud sus ! >>

Au quai d'débarquemint, inn foule eud Congolais lé z'acclamote :

<< Vife Tintin ! Vife Milou ! Vife Tintin et Milou ! >> In intindot qu'cha, y avot minme dé pincarte dù qu'ch'étot écrit. Pis ché gins, y lé z'ont porteu su leu z'épole jusqu'à leu z'hoteul.

Mé quéqu'an surquot dins l'ompe d'euch quai :

<<Pati-ince, eum n'ami ! Rira bin qu'y rira l'dernian. >> Dit l'home su qui Milou à quéhu.

Infin, l'soèr à l'hoteul.

<<A présint Milou, y é timps d'alleu dormir. >>

<<Cha ché inn'  banne ideu ! ...

Achteur qu'in é su l'plinché dé vaques, euj'sins qu'euj' vas ronfleu come inn' marmotte. ...

Seul'mint....

Oh ! Oh ! Dé moustique ! ...

Heureus'mint qu'in sé qu'lé moustique ne piqu'te pon lé quiens !

Wouaaah ! S'fésint piqueu à s'truffe.

Mé in dirot qu' lé cousin, euss, n' eul savte pon.

Wouaaah ! >> S' fésint piqueu à s'queue l'fos chi.

Y s'aufe come y peut, et porsuivit pa ché bestioles, y finit pa s'réfigieu sous inn'couverture.

Eul lind'mon matan, Tintin l'révelle :

<< Et bin , Milou ! T'a passeu inn'banne nuit ? >>

Milou sort sin musio. Tintin vot bin qu'sin quien né pon bin in po-ant et qu'y lé piqueu d'partot.

<< Oh là là ! Min pofe viu Milou. Come teu v'là chi arringeu. V'là chou qu'y l'arrife quind in dort sins s'moustiqueur !

5

In va tot d'suite eut sogné ! >>

A pone ché soins termineu qu'in buque à ch'eul porte :

<< Intré ! >>

<< Mister Tintin ? >>

<< Ché mi ! ... >>

<< Mister Tintin, euj'sus chargeu pa l'jornal de New york Evening Press, d'vos offrir chonque mille dollar pou ch' l'arportage que vos allé feure in Afrique. V'là chi in chèque eud mille dollar pou vo premian frais et v'là chi l'contrat !

Volé-vos signeu ! ... >>

Y n'a pon l'timps d'parleu qu'in aute arprésintint d' jornal, y li fé inn' aute propositian.

<<Mister Tintin, le Dailly Paper de Londres dont j'sus l'arprésintint vos offe mille lifes sterling pou l'exclusiviteu du récit d'vo future avinture in Afrique.

Vos ête d'accord ! S'pon ? >>

<< Plait-il ?  ... >> Y n'a pon l'timps d'parleu qu'in aute l'attique.

<< Et mi, sénior Tintin, j' arprésinte le Diaro de Lisbona, de Lisbonne. Si vo Excellince veut bin nos feure l' honneur d'nos donneu l'exclusiviteu d'sin r'portache, in y f'ra in plésir d' l' y verseu l'somme de chinquinte mille escudos. >>

<<Vé-yons ! Vé-yons ! Perlons sérieus'mint ...

J'doupe eum somme. Dix mille dollar, cha vos conviant-y ? >>

<< Queu pinse-tu d'toute ché propositian, ti ? >> S'adressint à Milou .

<<In nos arrache, pon vrè ? >>

Pis s''dressint à euss , Tintin :

<<M'sieu ! J' vos armarcie de vo visite. Vo propositian sont évidammint intéressinte , mé j' eun puis lé z'accepteu. J' sus d'jà ingageu vis à vis d' aute journio. Auqueul jé donneu l'exclusiviteu d'mé z'arportache.

Pouleur chi vos vodrote bin nos lécheu, in voudrot bin s habilleu ... >>

Apreu qu'y sont infin parti :

<< Et mint'nint, chi in pinsot à no vo-yache.

Vé-yons ! Y nos fot in boy et inn' autio ... >>

<<Ouais et n'oblions pon l'moustiqueur ! >>

6

Pis Tintin fé l' tour du villache et y troufe in boy :

<< Alors t'as compris, Coco ? Teu m'accompagn'ra durint tout l'vo-yache. >>

<< Bin, Missié ! >>

Pis y troufe inn' autio :

<<Inn autio ? Je cros qu'jé chou qu'y vos fot. Ravisé : In excellint modèle transsharien. Vos pové l' prin-ne in confi-ince. >>

Eul lind'mon matan !

Lé v'là in route. Ch'l'autio é quarqueu eud caisse, eud victuale, et d'in apparel photo-caméra cinématographique su pieu.

Y roul'te come cha su lé piste jusqu'à l'hoère eud'miet.

A SUIVRE

7