HERGE

 

 

Les Aventures de TINTIN

En PATOIS du Cambrésis

 

 

 

 

EUCH TINTIN IN AMERIQUE

 

 

 

PAR

 

HECTOR MELON D’AUBIER

 

 

 

EUCH’ TINTIN IN AMERIQUE

 

A Chicago, à dù qu’y rin-gn’te in mètes, chés bindits de tot’espinces. In soèr 

Eul chef dé bindits y avot réunis sé lièt’nints.

<< Ch’eul situatian é bin nette. In nos invot eul fameux arporteur Tintin pou lutteu conte nos autes. Ché in adverseure ardoutape. Y l’a  équoué in plin qu’j’avos conçu pou controleu ch’eul productian du diamint au Congo.

Plusieu d’vos z’ami y ont été imprisonneu là-bas. Mint’nint, euch l'arporteur viant s’attaqueu à nos z’autes.

V’là chi mé ortes : y n’fot pon qu’euch Tintin y ard’meure in seu jour à Chicago.

Qu’euj’dis !!! >> In frappint su l’tape

Pindint ch’timps là, euch tron arrife à l’gare d’Chicago.

<< Nos v’là chi à Chicago, Milou. >> Annance Tintin, in déquindint du tron.

<< D’abord à l’hoteul ! >>

<< Prinds garte à ti Chicago, nos v’là chi ! >> Pinse Milou s’approchint du taxi.

<< Conduisé-meu à l’hoteul Osborne. >>

<<Tot va bin ! >> Pinse eul chauffeur.

Pis claquint ch’eul portieure :

     << All right ! Ché voleu sont fermeu. Euch l’osio y l’é pris ! >>

A l’intérieur d’euch taxi, Tintin :

<< Et bin, quo qu’y s’passe ? In nos a infermeu ! Et ché voleu sont in acieu ! >>

<< Rin  à feure ! J’eun’ peu pon y morte. Ché trop dur ! >> sort Milou

Sodin, « BOUM ! » inn’ crevésan.

<<Zut ! Ché bin atobé ! Min pneu y lé crevan ! …

Vite inn’ aute reu ! N’perdons pon d’timps ! …..

Ch’l'ouvrache fé :

Cha va ! In s’ra à l’hoère à ch’rindeu-vous. >>

Ch’eul votiure arpart, léssint Tintin à ch’bord d’eul route L’aute y avot pon vu qu’y l’avot eu l’timps d’décopeu l’bas d’eul portieure aveuc inn’scie qui trainot dins l’taxi.

<< Bon vo-yache, m’n’ami ! Y l’in f’ra inn’ tiète quind y verra qu’jé so-ieu inn’ portieure et qu’eujm’su équapeu. >> l’y envot Tintin

<< Eul pus bisquint ché d’eus trouveu  dins l’pays d’l’automobinle et d’vir feure dix minles à pieu ! >> pinse Milou

 

1

 

<< In a d’eul chince, Milou. V’là chi  inn’ moto d’police. >>

Lé z'arrétint d’in sine d'eus mon. Y sont deux, ché inn’ moto aveuc in side-car.

<< Vos quéhié à pon. Pové-vous arjointe l’voture qu’vos v’né d’crosseu et d’ arréteu sin conducteur ? Y a éssé-yeu d’m’inl’vé .>>

Y font monté Tintin à l’arrian d’eul moto et Milou avec l’aute dins l'side-car.

Tintin fé inn’dernian arcommindatian à Milou :

<< Tians-teu bin Milou ! Et né pon peur. ….

A ch’tron là, in aura vite fé d’arjointe ch’vaquabanne là . >>

Pus tard, ch’l’agint s’adréssint à Tintin :

<< Ché l'votiure là ? >>

<< Ouais, ché bin  cheulle là ! >>

Doublint l’taxi, l’agint d’police sort sin révolver  et l’y ordonne d’s’arréteu :

<< Stop !  ….

Haut lé mon !>>

<< Pouquo m’avé-vos inl’veu ? >>

<<In m’avot promis chonque chint dollars chi j’parv’nos à vos imbarqueu dins min taxi. Pis à bésseu ché voleu d’acieu et à vos déposeu à in endrot conv’nu. >>

<< A dù cha ? >>

<<L’indrot a dù qu’eujdevos vos conduire ? …. Et bin …. J’espeure qu’vos in tiandré compte d’eum’ sincériteu ….. J’sus preu à vos l’dire. >>

Seul’mint, in home attindot pus lon, cacheu darrian in ape. Y l’avot in boum’rang à s’mon !

Y l’attique vite fé su l’tiète d’euch chauffeur qu’y qué dins lé pommes.

Tintin a eu l’tipms d’eul vir passeu et y l’fé vir à ché policieu.

<< Là ! Ravisé in boum’rang !>>

Trop tard, ch’ti chi arviant dins l’mon d’l’home qu’y s’infuit in prénint l’moto d’ché policieu .

<< In votiure, vite ! Porsuivons-le! >> ordonne Tintin

Du cop, in policieu y conduit ch’taxi

Li, Tintin y lé monteu su l’marche-pieu aveuc Milou .In dé policieu l’y danne sin révolver :

<< V’là, prené m’n’arme .>>

<< Merci ! ….

In approche d’eul ville, n’eul’ perdons pon d’vue. >>

 

2

 

L’home à moto fance l’pus vite qu’y peut :

<< Pourvu qu’euch’Tom s’troufe là dù qu’y fot aveuc euch’l’autio bélieu, sinon j’vas chi ête pris ! >>

Fonçint drot d’vint li, y passe l’carr’four. Inn’ votiure rouche arrife su la goche et rinte dins ch’taxi qui s’artourne su li minme.

Ché occupint y z’in quète dins lé vapes.

Pis ché badauts.

<< Ché in taxi conduit pas dé policieu qu’y a éteu pris inn’ équarpe pas inn’ aute autio. …..

Queu terripe accidint !!! ….

Queu choc ! ….. >>

Inn’ ambulince all’ arrife et prind in charge ché blésseu, pis lé ameune à ch’l’hopital .

 

Queuque jours pus tard …

Sortint d’l’hopital, Tintin :

 << Nos v’là infin su pieu, Milou ! Cha arot pu ête pus grafe … >>

<<Cha fé du bin d’print' l’eur !>>

Attindint d’traveurseu l’rue, y s’arreut’te su inn’ plaque su l’trottoère.

<< Queu trafic ! >> Tintin

<<Euj’ plins ché quiens chicagoleu qu’y drote traverseu ché rue … >>  Milou n’in pinse pon pus qué sodin !

Ch’eul plaque , all’ déquint dins l’so. Deux homes assom’te Tintin, et l’plaque à l’armonte come si de rin n’étot.

Ché deux homes l’immin’te dins in salon.

<< Sé-yons prudent !>> pinse Milou qu’y suivot ché deux arsoules.

Pis y l’allong’te su in foteul.

L’in d’euss :

<< Alors cha va ? Teu prévians l’patron. …

Tintin s’révelle :

<<Quoqu’y mé chi arriveu ? >>

Du cinlme, min tiot ami. J’vos é à l’oeul. V’là chi min patron.

In aute home, qu’y sin-ne ête eul’chefs’n’intreu :

 

3

 

<<Ah ! Ah ! L’v’là, ch’fameux arporteur !

Et ché ch’tiot fréluqueu  là qu’y voulot s’attaqueu à mi. Mi, l’ dé capons d’Chicago. …

Vos avé bin ouvreu – s’adréssint à l’in dé z’homes- v’là chi ch’eul somme conv’nue. >>

<< Merci, chef ! >>

<< Et v’là pou ti-z’aute – s’adréssint l’fos chi à l’aute – et achteur débarrassé meu bin vite d’euch gaillard chi. >>

<< Ouais chef ! >>

Tintin ravisse ch’l’home in face d’li qu’y prépare sin révolver.

<< Pon mo-yan d’y équapeu à ch’gredin. Eul fos chi j’sus bon pou la romin-ne. >>

Mè Milou velle au grin :

<< Vit’ pon in instint à perte. >>

L’aute compte :

<< In …

Deux …>>

<< Et tros ! >> Qu’y dis Milou in poussint inn’ cruche vite su l’tiète d’euch margoulins.

        << Merci, Milou ! Inn’fos d’puss, teu m’as sauveu la vie ! >>

<< Cha li a coupeu sin chifflot, hin ! T’as vu cha ? >>

<< Vé-yons achteur chou qu’y s’passe chi ?

P’t-ête bin qu’eujtrouv’ré chi l’mo-yan d’arréteu chette binte d’agoneu ! >>

<<Vodros-tu qu’j’aille appeleu l’police, Tintin ? >>

L’aute pindint ch’timpss’révelle :

<<Quo qu’y mé arriveu ?

Ossi vrè qu’euj’ m’appeule Pietro, j’vas prin-ne m’n’arvinche.

Euj’né pus min révolver, mé v'là chi inn’ arme tout ossi terripe

Saisissint inn’ aute cruche, et s’préparint à l'linceu su Tintin, qu’y étot à l’acoute à l’porte :

<<Quo qu’y raconte bin là ? … >>

<< Quo qu’y s’passe ? >> pose Milou

Y n’aront pon d’répanse à leu questian. Pietro lince eus’cruche à ch’momint minme qu’sin chef y l’oufe ch’eul’ porte. Et qu’y , bin sur, l’archot su sin nez.

 

4

 

Tintin in profite, y fance su Pietro et l’rinveurse, tindis qu’eul’ bindit qu’y accompagnot sin chef l’porsuit in li tirant d’sus.

<< Mille mi-ions d’ananas ! Queul’agozil ! Y l’a réussi à déquinte euch’patron et Pietro . >>

Tintin y  a eu l’timps d’eus cacheu darrian in ridio. Pis …

<<Ban, l’v’là perti ! J’vas m’occeupé dé deux autes in attindint sin r’tour.>>

Sautint su l’in pis su l’aute, y lé ligote et lé baillanne.

<< Et lé v’là fich’lé tot lé deux. Au tour d’euch trosiam’, mint’nint .

Ah, j’l’intinds qu’y arrife. Y l’arviant su ché pon. >>

<< Bon sing d’bon sing ! A dù qu’y la bin pu s’cacheu ? >>

<< Attintian, l’v’là ! >> Préviant Milou

Et in li assénint inn’caïère su s’n’attinte :

<< Et hop ! Au trosiam’ eud’sé gins. …

<< Queu ju d’massacre . >> Milou

Pis Tintin queurt déhors vir apreu la police. Y n’in vot in :

<<Vite, vite Polic’man ! Euj’ vians d’capteuré euch fameux Al Capone et deux d’sé complices. >>

Arsevint in cop d’matraque su s’tiète à sin tour, Tintin in quet par terre. L’polic’man in profite pou téléphoneu à sin burio.

<<Allo ! V’né chi ! j’vians d’arréteu in jonne blinc bec qu’y prétint avoèr capteuré Al Capone et sé deux Lièt’nint. …>>

Ch’policieu y trouvot l’timps long :

<< A dù qu’y tran-ne core euch’panieu à salate. Y devrot d’jà ête chi …>>

Tintin y sort d’eus n’étourdiss’mint :

<< Pouquo ! Mé pouquo qu’y m’ a assomeu ? …

Dites donc, vos, cha n’va pon, quo qu’cha signifie cha !

J’vos répète qu’jéprisonnieu Capone et ….. >>

<< Incor toudis ?!! >> voulint li arséneu in aute cop d’matraque.

Tintin comprind qu’sin salut y é dins l’fuite. Y fout l’cimp pindint l’aute y chiffe in li queurrint apreu. Mé ché pon cha, in aute policieu arrife d’vint li.

<< Attrape leu Tom ! Attrape leu ! >>

Tintin y vot in’ ruelle su s’drote intre deux batimints. Y teurne d’in cop sec. Ché deux policieu importeu pa leu élin, y s’rinte eud’dins et quète pas terre.

 

5

 

Tintin a l’timps d’eus’sauveu.

<< Ouf ! Jé core eu d’eul’ chince ! M’v’là débarasseu d’euss ! >>

Rintrint trinquil’mint y n’né pinsif :

<< Et mint’nint, comint artreuvé Milou ? J’eun’ poré jinmeu arconnètte ch’eul’mason dù qu’y lé resteu ! … >>

Pis y s’arreute pou boère inn’ limonate, ché là qu’y l’intind arriveu Milou :

<< Wouah ! Wouah ! >>

<< Mé, mé … In dirot min Milou, m’parol’. Comint qu’té arriveu chi ? >>

Li servint inn’ limonate aveuc deus pales pou li aspireu :

<< Oh ! J’meurs eud’so ! Lèche meu d’abord m’rafreuchir. Pis j’t’arconte cha insuite. >>

Euch servieu n’in r’viant pon d’vir Tintin et Milou converseu insin-ne.

<<Crénom de diousse ! Incro-yape d’intinte cha ! >>

 

Pis y arprèn’te leu route veurs l’hoteul dù qu’y devot déquinte et Milou y fini s’n’explicatian.

<< Alors, in aute zigoto à v’nudétacheu. Jé bin ésséyeu d’l’in impécheu, mé tout Milou qu’euj’sus, à quate conte in, ch’eul’ partie n’étot pon égale et jé du m’infuir . Jé suivant t’piste et meu v’là ! … >>

<< Ché bin, Milou ! Té in brafe quien !

Arwette, v’là chi infin l’hoteul a dù qu’in nos attind d’puis tros jours.>>

<<Wa-oh !  Queu palache ! >>

Tintin rinte dins l’hoteul et y s’dirige veurs l’acceul pou s’rinségneu su s’quinme.

<<Ah ! Vos v'là, M’sieu Tintin !In désespérot d’vos vir. Vo quinme a lé prète d’puis queuqu’jours. >>

<< J’aros du arriveu pus tôt, mé jé éteu artardé malgreu mi. >>

In cli-int assis dins in fauteul l’obseurvot tindis qu’in groum l’conduit à s’quinme :

<< Ah !Ah ! Eulzév’là lé gaillard. J’vas immédiat’mint aveurti ch’patron . >>

Dins l’ascinseur :

<< Ché à chétiame  étache, M’sieu ! >>

<< Ah, bon ! >>

Arriveu .

<< V’là chi vo quinme, M’sieu Tintin ! >>

Pis y rinte dins s’quinme, et y vot su l’tape inn’lette appuyeu su l’vasse d’fleurs.

 

6

 

<< Tians ! Inn’ lette pou mi ! Qui ché qu’y peut bin m’écrire ichi ? >>

«  M. Tintin. Dernian aveurtiss’mint .

Y a in tron pou New-york d’mon à 11H 55. Là, y a in paq’bot in pertince pou l’Europe. Si d’mon à midi, té core là, eut’vie vodras pu grind cosse… »

Tintin sins s’démonteu y l’arrache ch’eul’lette

<< V’là chou qu’euj’fé d’vos m’naces, M’sieu Capone ! >>

<< Ouais ! V’là chou qu’nos fésons d’vos m’naces ! >> rinquérit Milou in finissint d’déchiqu’teu ch’eul’lette.

Pis Tintin y vas s’couqueu.

 

Eul’lind’mon matan à 11H55. Euch’téléphane y sanne :  « DRING, DRING ! »

<< Allo ! … Allo ! …Allo !  …Allo ! … >>

Persanne qu’y répand .

<< Quo qu’in nos veut, Tintin ? >> D’min-ne Milou.

In dé deux lièt’nint l’acoute cacheu d’in l’aute pièche :

<< Tot va chi bé ! Ch’cop d’téléphane m’a peurmis d’intreu sins evéilleu s’n’attintian ... >>

<< Curieux !!! In a raccrocheu. Inn’erreur sins doute. Mé, j’intindot chuchoteu à l’aute bout du fil. … >>

In raccrochint sin téléphane, Tintin aperchot ch’bindit qu’y s’arflète dins ch’eul glace du salon :

<< Douch’mint ! Pon d’bruit ! N’t’inquieut’ pon Milou, reste ichi. J’vas li joueu in tour à m’façan. >>

S’élognint et passint pas inn’ farniètte, y fé l’tour pa ch’mur et rinte dins l’appeurt’mint pa l’aute farniètte, derrian ch’bindit qu’y s’inquiéteu d’eun’ pus l’intinte.

<< Bin, dù qu’y lé ? Quo qu’y fé ? >>

Tintin y arrife derrian li :

<< Ichi ! Haut lé mon, M’sieu ! …

Pis y print  ch’téléphane :

Allo ! Allo ! … Ichi ché Tintin. … Ouais ! Invo-yé meu deux policieu. A l’hoteul Osborne … J’vos attinds. >>

Pus tard, in franpe à l’porte.

 

7

 

<<Intreu ! >>

Ché deux policieu in civil qu’y font leu intreu.

<<Permété-meu d’vos féliciteu, M’sieu Tintin. Vos avé captureu là in dingereu malfésint.

Volé vos nous suife au poste pou lé formaliteu d’usage. >>

<< Aveuc plaisirs. >>

Et lé v’là monteu tartous dins in autio qui lé conduit dins in immeupe. Tintin y rinte in confi-ince. Pi in l’fé intreu dins ch’ burio dù qu’y a inn’pincarte marqueu Police à l’porte d’intreu .

<< Ve-yé m’suife, M’sieu  Tintin. Ch’commissaire vos attind. >>

<<Tout cha ché luche ! Heureus’mint jé  pris mé précautians. J’sus armeu. >> S’dit Tintin

<< Ve-yé intreu, j’vos prie …. >>

Tintin y rinte dins l’pièche.

L’aute inspecteur y arfeurme ch’eul’porte et y décroche ch’eul’ pincarte Police.

In n’in vot inn’aute où ché marqueu : G.S.G. Chou qu’y veut dire : Gingsteurs, Syndicat of, Chicago.

 

A SUIVRE

 

8